Nënkryetari i Partisë Demokratike të Kosovës Memli Krasniqi ka hedhur poshtë pohimet e një pjese të mediave se kanë nisur negociatat për përfshirjen e kësaj partie në Qeverinë Hoti, duke i quajtur ato lajme të rreme.

“Këto janë lajme të rreme. S’ka plane për negociata. Unë isha në Vlorë për tri ditë dhe nuk kam dëgjuar. PDK nuk funksionon si parti patriarkale ku vendosin dy apo tre njerëz. Ne vazhdojmë të jemi parti opozitare. Mendimet personale i çmojmë, por janë vendimet ato që i respektojmë. Vendimi i PDK-së është i qartë që pas 6 tetorit”, është shprehur Krasniqi në DebatPlus në TV Dukagjini.

Ndryshe, anëtari i Kryesisë së Partisë Demokratike të Kosovës, Xhavit Haliti, ka thënë se partia duhet të hyjë në koalicionin qeveritar.

Lëvizja Vetëvendosje nuk mund ta rrëzojë Qeverinë Hoti, pavarësisht se ka nisur procedurën për mbledhjen e votave për një seancë të jashtëzakonshme në Kuvend.

Deputeti i Partisë Demokratike të Kosovës Memli Krasniqi e ka quajtur hajgare çështjen e mocionit të mos besimit të ngritur nga partia tjetër opozitare, për ta çuar Hotin në shtëpi.

“Nuk mund të rrëzohet qeveria pa 61 vota. Ajo është hajgare. LVV duhet të tregojë për vijat e tyre të famshme të kuqe ndaj PDK-së. Mocioni i mosbesimit nuk ka shans të jetë i suksesshëm”, ka thënë ai në DebatPlus të TV Dukagjini.