E pabesueshme: Kandidatin boshnjak për deputet e bëjnë shqiptar dhe ia mohojnë të drejtën e kandidimit DOKUMENTE
Emin Neziraj, profesor shumëvjeçar në universitetin e Pejës “Haxhi Zeka” dhe për një kohë edhe në nje kolegj privat i gjuhës boshnjake, ishte kandidat nga Nisma Socialdemokrate për njërën nga garat lokale në komunën e Pejës.
Neziraj është propozuar për të kandiduar në listën e NDS-it (Nova Demokratska Stranka), derisa ishte certifikuar nga KQZ-ja si kandididat për deputet nga kjo parti. Deri këtu gjithçka ishte në rregull, derisa një ankesë nga kryetarja e partisë SDU, Duda Balje në drejtim të PZAP-it i ka kushtuar atij me mos certifikim si kandidat i NDS, transmeton Ballkani.info.
Thelbi i ankesës së Baljes ishte tek etnia e Nezirajt, derisa ajo në ankesën e pranuar të PZAP-it thotë se Emin Neziraj është me kombësi shqiptare.
Nga partia NDS, e ish-ministrës Emilia Redzepi, thonë se Neziraj i përket komunitetit boshnjak, e një gjë të tillë për Ballkani.info e pohon edhe vetë Emin Neziraj.
“Unë i kam prezantuar të gjitha faktet, të gjithë shkollimin, që nga ai fillor e kam kryer në gjuhën boshnjake, përndryshe unë jam doktor shkence dhe ish-profesor i Universitetit të Pejës e Prizrenit për disa vjet”, thotë ai.
Neziraj nuk ka qenë në dijeni për ankesën e ish-deputetës së Kuvendit të Kosovës, Duda Balje në PZAP, derisa e quan tendencioze vendimin për tu ankuar në PZAP, sepse sipas tij ajo e sheh si kandidat tepër të fortë që realisht mund të ndikojë në votat e palës kundërshtare.
Ai e ka cilësuar si shkelje të të drejtave të njeriut vendimin e pakuptueshëm ndaj tij, derisa ka thënë se ka bërë apel edhe tek ambasadat e shteteve të forta botërore për tu marrur me këtë rast, teksa shton se në dijeni për këtë gjë është edhe Ambasata e SHBA-ve në Kosovë.
Në ndërkohë ka ardhur vendimi i Gjykatës Supreme me të cilin hidhet poshtë ankesa e NDS për Emin Nezirajn./Ballkani.info/
Intervistën e plotë me Emin Nezirajn e gjeni në poshtë:
Ballkani.info: A keni qenë i informuar se ka pasur një ankesë kundër jush në Panelin Zgjedhor për Ankesa dhe Parashtresa?
Neziraj: As unë e as partia ime NDS, nuk ka qenë e informuar nga PZAP-i për ankesën e znj. Duda Balje, atë ditë kur kam kuptuar kam qenë në Ulqin në kuadër të punës time, jam kthyer pasi një ankesë të tillë nuk e kam pritur dhe ka qenë mjaftë befasuese, jam marrë me procedurat për të dëshmuar kombësinë time, e vetmja mënyrë për të dëshmuar një gjë të tillë ka qenë të marrë një vërtetim nga Zyra Civile e Boshnjakëve, vendim të cilin e posedoj.
Ballkani.info: Çfarë fakte tjera posedoni për të dëshmuar për etnicitetin tuaj?
Neziraj: Unë i kam të gjitha dokumentat, studimet i kam kryer që nga shkollimi fillor në gjuhën boshnjake, madje edhe temën e masterit e kam në gjuhë amtare (boshnjake), unë nuk e di çka tjetër t’i ofrojë, ose nëse dojnë të ma bëjnë edhe testin e ADN-së.
Ballkani.info: Ke qenë kandidat nga Nisma Socialdemokrate, si ke hyrë në këtë parti?
Neziraj: Nisma më është vetëofruar duke vlerësuar kuadrin tim shkencor, ata kanë pasur lëvërdi dhe madje nga ky subjekt kam dalur më i votuari në qytetin e Pejës, unë kam kandiduar me Nismën në nivel lokal.
Ballkani.info: A ke qenë pjesë e ndonjë subjekti tjetër apo NDS është partia e vetme boshnjake në të cilën ju jeni pjesë?
Neziraj: Në fakt NDS nuk ëshë partia ime e parë, në vitin 2005 kam qenë pjesë e Iniciativës Lokale Boshnjake për zgjedhjet lokale në Pejë.
Ballkani.info: A jeni ankuar në Gjykatën Supreme dhe cilat dokumente i keni ofruar si dëshmi për përkatësinë tuaj nacionale?
Neziraj: Po jemi ankuar në Gjykatën Supreme derisa e kemi dërguar Vërtetimin e partisë NDS, të gjitha diplomat e mija dhe të gjithë aktivitetin tim ndër vite, me dokumentacionet e plota.
Ballkani.info: Si e vlersoni vendimin e ankesës nga Duda Balje në PZAP dhe cilat janë pritshmëritë tuaja për vendimin e Gjykatës Supreme?
Neziraj: Znj. Balje ka orkestruar të gjithë këtë gjë, sepse më sheh kandidat shumë “të rrëzikshëm” në votat e komunitetit, sa i përket vendimit të GJS nuk më çudit fare nëse ma hedh poshtë ankesën, por që pres që drejtësia të flas drejt.
Ballkani.info: A janë në dijeni i institucionet e huaja për rastin tënd dhe moslejimin nga PZAP për kandidim?
Neziraj: Po janë në dijeni edhe Ambasada e Amerikës, në një televizion unë ju kam bërë apel publik për shkeljen ndaj të drejtave të njeriut që po më bëhet mua.