Petrit Hajdari, i është drejtuar qytetarëve të Drenasit përmes një postimi në Facebook-un e tij, pasi u zyrtarizua nga Partia Demokratike e Kosovës si kandidat për kryetar të Drenasit.
Në cilësinë e kandidatit për kryetar të Komunës, Hajdari i fton të gjithë për “unifikim, bashkim e rrugëtim përpara ashtu siç i takon PDK-së në Drenas: bashkë e fuqishëm”, shprehet ai.
Ai thotë se “Drenasi do të jetojë më mirë sepse këtë do ta mundësojmë ne. Të gjithë ne bashkërisht”.
I njëjti është shprehur i sigurtë për fitore në zgjedhjet e 12 tetorit.
Postimi i plotë:
PDK E DËGJOI ZËRIN TUAJ: DO TË JEM KANDIDAT I PDK-SË PËR KRYETAR TË DRENASIT
Të dashur qytetarë të Komunës së Drenasit,
Drenasi është vendi ku jam rritur e formuar dhe arsyeja pse jam në politikë. Me nderim të lartë e falenderim të sinqertë për kryetarin Memli Krasniqi dhe kryesinë e Partisë Demokratike të Kosovës, kam pranuar konfirmimin e kandidaturës sime për kryetar të Komunës së Drenasit nga radhët e Partisë Demokratike të Kosovës.
Rrugëtimi im me PDK-në ka qenë i gjatë, sfidues por jashtëzakonisht krenar. Sot, edhe zyrtarisht, si kandidat i PDK-së për kryetar të komunës së Drenasit, i ftoj të gjithë për unifikim, bashkim e rrugëtim përpara ashtu sic i takon PDK-së në Drenas: bashkë e fuqishëm.
I falenderoj nga zemra të gjithë qytetarët e komunës së Drenasit që i kanë besuar vazhdimisht Partisë Demokratike të Kosovës e gjithashtu për besimin e thellë dhe emocionues që kam marrë unë gjithë këto ditë.
Drenasi është adresa jonë e përbashkët dhe e vetmja. Gjithmonë ka pasur, ka dhe do të ketë gra dhe burra që i përgjigjen thirrjeve për ta bërë vendin tonë më të jetueshëm. Drenasi i është përgjigjur thirrjeve për revoltë, thirrjes së UÇK-së për luftë, thirrjes së PDK-së për shtetndërtim e do t’i përgjigjet edhe thirrjes së sotme për përbashkim. Përbashkim rreth vlerave të PDK-së sonë, asaj që është porosi e shenjtë nga Hashim Thaçi e Kadri Veseli.
Drenasi do të jetojë më mirë sepse këtë do ta mundësojmë ne. Të gjithë ne bashkërisht.
Fitorja jonë është e sigurt dhe angazhimi do të jetë maksimal.
Nuk kemi shtëpi të dytë. Drenasin e kemi të shenjtë. Ndaj të gjithëve, pavarësisht bindjeve, shtrij dorën e bashkëpunimit: Drenasi kushton më shumë se egot e kujtdo. E ardhmja e fëmijëve tanë është ajo që duhet të na bashkojë.
Zemra e Drenasit rreh për shërbim!
I juaji,
Petrit E. Hajdari







