Drejtori i policisë Samedin Mehmeti takim me Ardi Veliun: Zotohen për vazhdim të bashkëpunimit në fushën e sigurisë

Drejtori i Përgjithshëm i Policisë së Kosovës Samedin Mehmeti priti në takim Drejtorin e Përgjithshëm të Policisë së Shqipërisë Ardi Veliu.

Sot ambientet e Drejtorisë së Përgjithshme të Policisë së Kosovës, drejtori i përgjithshëm i PK-së,Samedin Mehmeti së bashku me drejtuesit më të lartë të policisë, priti në takim Drejtorin e Përgjithshëm të Policisë së Shtetit, Ardi Veliu me bashkëpunëtorë.

“Gjatë takimit Drejtori i Përgjithshëm Mehmeti i dëshiroi mirëseardhje përfaqësuesve nga Policia Shqiptare dhe theksoi se vlerëson lartë bashkëpunimin në mes dy institucioneve në të gjitha fushat e sigurisë dhe jo vetëm.

Qëllimi kryesor i takimit ishte shkëmbimi i eksperiencave dhe përvojave të deritanishme, procedurave të punës që përdorin policitë e dy vendeve, më konkretisht shkëmbimin e ekspertizës lidhur me sistemet elektronike, bazat e të dhënave në përdorim, si dhe çështje të tjera të rëndësishme të bashkëpunimit dhe ndërveprimit në mes të dy policive të të dyja vendeve.

Pas një prezantimi të bërë nga Policia e Kosovës për punën dhe funksionimin e  sistemit të menaxhimit të informacionit të burimeve të policisë, palët u zotuan për vazhdim të bashkëpunimit të ndërsjellë në fushën e sigurisë si dhe mbështetjen në fusha specifike në mes të dy institucioneve policore”, thuhet në njoftimin dërguar mediave.