Drejtori i Arsimit në komunën e Podujevës, Avni Fetahu ka përshëndetur vendimet e shkollave të komunës së Podujevës që nesër të fillojnë me procesin mësimor.

Pavarësisht se Sindikata e Bashkuar e Arsimit, Shkencës dhe Kulturës në Kosovë ka konfirmuar se greva do të vazhdojë, një gjë të tillë duket se nuk po e thotë njësoj edhe drejtori në Podujevë.

Madje ai tha se përmes këtij vendimi për t’iu kthyer procesit mësimor, mësimdhënësit kanë dëshmuar vullnetin e tyre të sinqertë në kryerjen e misionit të tyre fisnik në edukimin e gjeneratave të reja.

Pak më parë, Ministria e Arsimit u ka bërë thirrje mësimdhënësve që të kthehen në shkolla për të vazhduar procesin mësimor.

Postimi i plotë i Fetahut:

I përshëndes vendimet e shkollave të Komunës sonë që nga nesër të fillojnë me procesin mësimor dhe shpërndarjen e librave për nxënësit nga klasa e parë deri në klasën e nëntë.

Përmes këtij vendimi për t’ju kthyer procesit mësimor, mësimdhënësit tanë kanë dëshmuar vullnetin e tyre të sinqertë në kryerjen e misionit të tyre fisnik në edukimin e gjeneratave të reja.

Na priftë e mbara!.