Doza e tretë e vaksinës kundër Covid-19 në Kosovë, flet infektologu Ilir Tolaj
Shtetet e rajonit kanë filluar administrimin e dozës së tretë të vaksinës anti-covid. Në Kosovë sipas njohësve shihet si i nevojshëm miratimi për dozën plotësuese për luftimin e pandemisë.
Vaksinimi kundër Covid-19 është i domosdoshëm në luftimin e këtij virusi. Në pjesën më të madhe të botës dozat e para dhe të dyta janë administruar dhe është filluar me dozën e tretë.
Sipas njohësve të kësaj fushe Kosova nuk bën përjashtim me nevojën e administrimit të dozës së tretë.
“Padyshim që edhe në Kosovë është e domosdoshme, sa më shpejt që është e mundshme dhe që të merret vendimi për lejimin e dozës së tretë për të gjithë ata që kanë kaluar më shumë se gjashtë muaj nga doza e dytë do të jetë e mirëseardhur. Le të vaksinohen që të gjithë, avarësisht prej moshës, gjendjes shëndetësore të tyre. Në mënyrë paralele edhe me ata që nuk janë vaksinuar deri tash apo ata që deri tani janë vaksinuar me një dozë”, thotë për RTK’në infektologu Ilir Tolaj.
Ne Kosovë që nga fundit i muajit mars ka filluar imunizimi dhe janë vaksinuar 1.6 milionë doza dhe rreth 720 mijë të vaksinuar me të dy dozat.
Izraeli, Gjermania, Franca e vendet e tjera kanë disa muaj që kanë filluar me dozën e tretë ndërsa Shqipëria, Maqedonia e Veriut e Serbia së fundi kanë lejuar filimin e dozës së tretë të vaksinës kundër Covid-19.
