Dokumenti i CIA-s për demonstratat e 1981-ës: Shqipëria ofron vetëm përkrahje morale
Demonstratat e vitit 1981 kishin rënë nën llupën e inteligjencës amerikane, CIA-s. Më 18 nëntor 1981, CIA ishte marrë specifikisht me problemet në Ballkan, respektivisht në Kosovë.
Demokracia.com ka siguruar dokumentin e CIA-s, ku analizohet demonstrata e 1981, roli i regjimit të Enver Hoxhës dhe Bashkimit Sovjetik për situatën e krijuar asokohe në Kosovë Sipas CIA-s, 8000 trupa të rregullta kishin arritur ta frenojnë, por jo edhe ta eliminonin dhunën që kishte shpërthyer më mars të 1981-ës. Po ashtu, në raportim e inteligjencës amerikane thuhet se Shqipëria përpos mbështetjes morale, asokohe nuk kishte ofruar diçka tjetër për shqiptarët e Kosovës.
“8.000 trupat e rregullta jugosllave në Kosovë kanë arritur të frenojnë, por jo ta eliminojnë dhunën që shpërtheu në mars 1981. Perspektivat janë për trazira të vazhdueshme latente, pasi që qeveria qendrore nuk është e gatshme të plotësojë kërkesën politike të popullatës për autonomi dhe nuk është në gjendje të devijojë mjaftueshëm burimet ekonomike në krahinë për të ulur kërkesat politike. Pikat e mundshme të ndezjes për të ardhmen janë 28 Nëntori kur Shqipëria dhe Jugosllavia festojnë ditët e tyre kombëtare, përvjetorin e marsit të shpërthimit të demonstratave të këtij viti dhe Kongresi i Partisë i planifikuar për diku në pranverën e vitit 1982”, thuhet në raportin e CIA-s, përcjell Demokracia.com.
Sipas inteligjencës amerikane, ai kongres do të ishte i diskutueshëm, pasi partia duhej të merrej me problemet ekonomike dhe rivalitetet rajonale, të cilat janë përkeqësuar nga çështja e Kosovës.
“Përkundër mbështetjes publike të Shqipërisë për shqiptarët në Kosovë, deri më tani nuk ka asnjë provë se ajo po ofron diçka më shumë se sa mbështetje morale. Bashkimi Sovjetik dhe Bullgaria kanë përsëritur të dy linjat e tyre standarde për nevojën për autonomi më të madhe në Kosovë, por deklaratat e tyre të zakonshme janë parë me alarm nga një udhëheqje gjithnjë e më e ndjeshme jugosllave”, thuhej tutje në raportin e CIA-s. /Demokracia.com/
