Mjeku ligjor në Kizhevak: Dy kafkat e gjetura mund të shërbejnë për identifikim

Sot gjatë gërmimeve në Kizhevak të Serbisë janë gjetur kafkat e dy personave.

Mjeku-ligjor Ditor Haliti ka thënë se këto dy kafka mund të shërbejnë për identifikim.

“Ekipi i Institutit të Mjekësisë Ligjore sot ka vazhduar punimet në Kizhevak. Janë shpërfaqur dy kafka të cilave iu kemi qasur me kujdes duke zgjeruar punën përreth tyre.Akoma nuk  i kemi tërhequr nga vendi ku janë meqenëse është dashur punë e kujdesshme për të gjetur çdo dëshmi përreth tyre.Gjendja e mbetjeve mortore është e mirë, mund të punohet me to dhe mund të shërbejnë për identifikim”, tha ai.

Ai ka shtuar se parashihet që gërmimet të zgjasin dy apo tre javë.

“Mirëpo ne duhet të ia lejojmë vetës edhe hapësirën se mund të zgjasin edhe një muaj. Me këtë ritëm, mendoj se deri në fund të këtij muaji do t’i përfundojmë të gjitha punimet.Ne sapo të përfundojmë gërmimet, vetëm atëherë do ta dimë numrin e individëve që kanë qenë të varrosur në këtë varrezë”,shtoi ai në KlanKosova.

Sipas tij, për momentin gjithçka është duke shkuar ashtu siç është planifikuar.