Die Presse citon avokatët e Thaçit: Akuzat përgënjeshtrohen nëse Prokuroria i jep të gjitha informacionet
“Dokumentet e nxjerra” dhe informacionet e pasakta e vështirësuan mbrojtjen e Hashim Thaçit, kritikojnë avokatët e të akuzuarit, i cili prej vitit 2020 e ka pritur gjykimin dhe prej atëherë është në paraburgim, raporton Die Presse.
Dy avokatët e Thaçit, që pas përfundimit të luftës ishte kryeministër dhe president i Kosovës, sipas Die Presse, kanë kritikuar ashpër Gjykatën Speciale të Hagës për Krimet e Luftës në Kosovë.
“Gregory Kehoe dhe Dastid Pallaska u ankuan për bazën e lëkundur ligjore dhe mungesën e mekanizmave të kontrollit për gjykatën, sa i përket gjykatës. Ndërsa gjykata e OKB-së për krimet e luftës në ish-Jugosllavi (ICTY) u krijua në bazë të një rezolute të OKB-së, Gjykata Speciale për Kosovën bazohet në Kushtetutën e Kosovës dhe ligjet kombëtare të Kosovës. Krahasuar me ICTY (1993-2017), ku ai punoi në rastin e ish-gjeneralit kroat Ante Gotovina, ka dallime të theksuara”, thotë Kehoe, transmeton Demokracia.com.
Gjyqtarët dhe prokurorët e ICTY raportuan në OKB dhe kontrolloheshin nga OKB-ja
“Fatkeqësisht, në rastin tonë nuk ka mekanizma kontrolli (…) Kjo mungon plotësisht në rastin tonë. Prandaj, nuk ka asnjë përgjegjësi për aktivitetet e zyrës së prokurorit publik”, citohet avokati i ish-presidentit Thaçi nga Die Presse, sipas të cilit, i vetmi mekanizëm i mundshëm kontrollues (korrektues) është media dhe shoqëria kosovare.
Mbi të gjitha, për Kehoe është gjithashtu një therr në sy që të akuzuarit nuk mund të mbrohen para gjykatës speciale në liri “siç ishte e mundur lehtësisht me ICTY”, por që të gjithë janë në paraburgim.
“Për shembull, ish-komandantët e UÇK-së Fatmir Limaj dhe Ramush Haradinaj u liruan si të dyshuar të ICTY-së. Limaj, më vonë ministër nën kryeministrin Thaçi, dhe Haradinaj, kryeministër i pasluftës, u liruan nga ICTY për krime lufte. Është të paktën “çuditëse” që ish-presidenti Thaçi, nga ana tjetër, nuk ka mundësi ta presë vendimin në liri për rastin e Gjykatës Speciale të Kosovës, edhe pse është treguar shumë bashkëpunues. Kolegu i Kehoe, Pallaska u ankua në intervistën me APA-s se ishin shkelur afatet edhe për Gjykatën Speciale, shkruan Die Presse.
“Gjykata u krijua më 3 gusht 2015 me një mandat pesëvjeçar dhe duhej të përfundonte në gusht 2020, gjë që nuk k ndodhur. Veçanërisht pasi jemi në vitin 2022, është evidente se gjykata ka pothuajse dy vjet që funksionon pa bazë ligjore, edhe nëse prokuroria ka mendim të ndryshëm për këtë. Kushtetuta e Kosovës parasheh ( …) që mandati të përfundojë pas pesë vitesh”, tha Pallaska, transmeton Demokracia.com.
Thaçi është duke pritur që nga 2020 gjykimin. Atij i është ngritur akuza në nëntor 2020 dhe ka dhënë dorëheqje nga presidenca për t’u përballur me gjykatën, por gjykimi nuk ka filluar deri më sot, sepse prokuroria është ende në kërkim të provave.
Kjo, po ashtu, është diçka për të cilën Kehoe është i shqetësuar. Gjithashtu, shumë dokumente iu dorëzuan mbrojtjes me redaktime, në mënyrë që avokatët të mos kishin akses në informacione të rëndësishme për mbrojtjen e tyre.
“Kjo është shumë problematike për zhvillimin e një strategjie të mbrojtjes, pasi ne nuk mund të verifikojmë deklaratat. Është jashtëzakonisht e vështirë për ne të gjejmë kundërargumente në mënyrë që t’i kundërvihemi akuzave”, citohet Kehoe.
Informacioni shfajësues ishte fshehur, kështu që pretendimi në disa raste, nuk është dhënë vend i saktë apo kohë e saktë për krimet në Kosovë që i atribuohen Thaçit.
Sipas avokatit, në të njëjtën kohë si negociator dhe pak a shumë si “diplomat” i UÇK-së, Thaçi ka qëndruar jashtë vendit herë pas here dhe për periudha më të gjata gjatë luftës, në mënyrë që akuzat mund të përgënjeshtroheshin lehtësisht nëse jepeshin informacione më të sakta.
“Avokatët kritikojnë edhe numrin prej 326 dëshmitarësh të prokurorisë, për dëshmitë e të cilëve janë planifikuar rreth 1930 orë. Nëse merret parasysh se edhe mbrojtja ka dëshmitarët e saj, gjykimi pritet të zgjasë disa vite”, shkruan Die Presse.
