Pak minuta më parë në qendër të Prishtinës, në rrugën “UÇK” me së paku katër plumba është plagosur Rinor Graiqevci. Gjendja e tij është stabile dhe jashtë rrezikut për jetë. Kështu kanë deklaruar për mjekët e QKUK-së të cilët po merren me trajtimin e Graiqevcit.
“Gjendja është stabile për momentin. Është jashtë rrezikut për jetë, Jemi duke i pritë rezultatet e analizave. Është plagosur në shpinë dhe ka disa plagë të armës”, ka deklaruar për Indeksonline, doktoresha Krenare Makolli.
E edhe Policia e Kosovës për rajonin e Prishtinës e ka konfirmuar plagosjen e këtij personi.
Sipas Policisë sot rreth orës 21:00 janë dëgjuar të shtëna nga arma e zjarrit në këtë rrugë të Prishtinës.
“Menjëherë pas marrjes së këtij informacioni në vendin e ngjarjes kanë dalë të gjitha njësitet e nevojshme policore, të mbështetura edhe nga njësiti rajonal për hetimin e krimeve si dhe njësitë e tjera për ekzaminim të vendngjarjes”, deklarojnë nga policia.
I plagosuri është drejtuar për në QKUK për trajtim të mëtejmë shëndetësor.
Aktualisht ekipet policore janë duke punuar në identifikimin dhe lokalizimin e vendndodhjes së personave të dyshuar.
Ballkani.info përmes dëshmitarëve të ngjarjes ka mësuar se një përleshje fizike ka ndodhur pak çaste para se ngjarja të ndodh, e më pas një person me motor sportiv ka sulmuar me armë zjarri.







