Këshilli i Sigurimit të OKB-së nuk ka arritur që me konsensus të miratojë rendin e ditës për muajin shkurt për shkak të mospajtimeve rreth asaj nëse duhet të vazhdojë edhe më tej praktika e raportimit tremujor në lidhje me raportin e Sekretarit të Përgjithshëm për misionin e UNMIK-ut në Kosovë.

Ambasadori i Guinesë Ekuatoriale në OKB, Anatolio Ndong Mba, ka thënë se organi i përbërë prej 15 shtetesh do të vazhdojë të takohet sërish këto ditët e para t; shkurtit për të gjetur një konsensus.

Duke përmendur shqetësimet rreth planeve në tentativë për mbajtjen e mbledhjes tremujore të Këshillit mbi Misionin e Administratës së Përkohshme të Kombeve të Bashkuara në Kosovë (UNMIK) më 7 shkurt, ai tha se disa anëtarë besojnë se mbledhja çdo tre muaj është shumë e shpeshtë për një takim të hapur mbi këtë temë.

Duke kujtuar një mospajtim të ngjashëm në lidhje me një pikë të agjendës shtatorin e vitit 2018 – kur Këshilli refuzoi të miratonte çdo program pune – ai shfaqi shpresën se anëtarët së shpejti do të arrijnë pajtim mbi këtë çështje dhe të shmangin një votë “për të ardhur keq” procedurale, transmeton Koha.net.

Siç raporton “Zëri i Amerikës” në gjuhën serbo-kroate, Shtetet e Bashkuara ishin kundër vazhdimit të kësaj praktike, me mbështetje të pesë shteteve anëtare të BE-së, përderisa Rusia ka kërkuar raportim tremujor si deri më tani.

“Këshilli i Sigurimit është i vendosur që përmes dialogut të vijë deri tek zgjidhja. Koordinatorët tanë politikë ditëve në vijim do të provojnë të gjejnë zgjidhje deri më 7 shkurt. Nëse deri atëherë nuk ka marrëveshje, do të zhvillohet një votim procedural dhe do të merret vendimi”, tha Mba.