LVV
Deputetet e pushtetit i japin merita Gani Jakupit për njohjen e pasaportave nga Spanja!!!
Të paktën dy deputete të Lëvizjes Vetëvendosje i kanë dhënë merita konsulentit të shumëpërfolur Gani Jakupi, për njohjen e pasaportave nga Spanja.
Të shtunën u bë e ditur se Spanja njeh pasaportat e Kosovës dhe se qytetarët mund të lëvizin lirshëm në Spanjë, si në zonat tjera të Schengenit. Dy deputetet, Jeta Statovci dhe Arbëreshë Kryeziu-Hyseni, këtë e kanë ndërlidhur edhe me emrin e konsulentit Gani Jakupi, që në nëntor u bë kryetemë për shkak të pagesës prej 7500 eurosh në muaj.
Bazuar në kontratën e Jakupit, të angazhuar si konsulent i jashtëm për ambasadorin e Kosovës në Bruksel, Agron Bajrami, ai është angazhuar për të rritur mundësitë e depërtimit të Kosovës te shtetet që s’e kanë njohur pavarësinë dhe për të ofruar konsulencë në fushën e diplomacisë publike dhe kulturore. Për një vit sa është kohëzgjatja e kontratës, Jakupi do të paguhet 90 mijë euro. Opozita pati kërkuar dorëheqjen e ministres Donika Gërvalla, ndërsa vetë ministrja e pati quajtur modeste pagesën mujore për Jakupin.
“Dikur projekte lobuese milionëshe për ndarjen e Kosovës, sot projekte lobuese për bashkim të Kosovës së pa ndarë me perëndimin. Opozita që dikur paguante për projektin e ndarjes së Kosovës u ngrit në këmbë për pagesën ndaj Gani Jakupit që lobon e ndihmon Republikën në Spanjë. Por, sot pas këtij lajmi a thua çfarë do të thonë. Pra, qenka e mundur të paguhesh nga vendi e t’i shërbesh njëmend atij. Ja një pjesë e rezultatit. Vazhdojmë!”, ka shkruar deputetja Jeta Statovci në Facebook, pas njohjes së pasaportave nga Spanja.
Ndërsa Kryeziu-Hyseni ka postuar një fotografi të Jakupit dhe kryeministrit Albin Kurti me Javier Solanën, ish-ministrin e Punëve të Jashtme të Spanjës dhe ish-sekretarin e NATO-s, dhe drejtorin artistik të Museut Del Prado, në Madrid të Spanjës në nëntor 2022. “Foto që kuptimësohet më shumë sot”, ka shkruar ajo.
