Dënohet me 13 vjet burgim për vrasje

Gjykata Themelore në Gjilan ka shpallur Aktgjykim dënues ndaj të akuzuarit M. A. në kohëzgjatje prej trembëdhjetë (13) vite burgim, raporton Ballkani.info.

M.A akuzohej për vrasjen e S.R. me 18 gusht të vitit 2016, në Ferizaj.

“I akuzuari, me datë 18 gusht 2016, rreth orës 18:00 në rrugën “Rexhep Bislimi” në Ferizaj, me dashje ka privuar nga jeta tani të ndjerin S. R., duke shtënë në drejtim të tij dy herë me revole të tipit “Vzor” 50 të kalibrit 7.65 mm”, thuhet në komunikatën e Gjykatës, përcjell Ballkani.info.

Në ditën kritike i ndjeri takohet me të akuzuarin dhe fillojnë të bisedojnë, lidhur me një mosmarrëveshje të mëhershme dhe pas një bisede te tensionuar i akuzuari nxjerrë revolen dhe shtënë dy herë në drejtim të ndjerit S. R., i cili po ashtu posedonte një revole.

Me këto veprime, trupi gjykues ka vlerësuar se i akuzuari M. A., ka kryer veprat penale “vrasje” dhe “mbajtja në pronësi kontroll ose posedim të paautorizuar të armëve”, vepra të sanksionuara me Kodin Penal të Republikës së Kosovës (KPRK).

Trupi gjykues për dispozitivin e parë të aktakuzës ka shqiptuar dënim prej 12 vite e gjashtë muaj burgim, ndërsa për dispozitivin e dytë i shqipton dënim një vit burgim.
Konform nenit 76 paragrafit 1 të KPRK-së, të akuzuarit i shqiptohet dënim unik në kohëzgjatje prej 13 vite burgim.

Palët kanë të drejtën e ankesës ndaj këtij vendimi në Gjykatën e Apelit. /Ballkani.info/