Milan Radoiçiq
Daçiq: Ekstradimi i Radoiçiqit në Kosovë është i pamundur
Ministri i Punëve të Jashtme të Serbisë, Ivica Daçiq, ka deklaruar se është “e pamundur” ekstradimi i ish-zëvendëskryetarit të Listës Serbe, Milan Radoiçiq në Prishtinë.
“Të gjitha proceset gjyqësore do të zhvillohen para gjykatave vendase,” tha ai.
Këtë Daçiq e ka thënë në një intervistë për agjencinë Beta duke komentuar urdhërarrestin e lëshuar nga Organizata Ndërkombëtare e Policisë (Interpol) për Radoiçiqin.
Interpoli lëshoi një urdhër për Milan Radoiçiq për një sulm terrorist në Banjskë.
Lajmin për këtë fletarrest e ka konfirmuar për Radion Evropa e Lirë (RSE) ministri në Qeverinë e Kosovës, Nenad Rashiq, duke thënë se ai është lëshuar me kërkesë të Ministrisë së Punëve të Brendshme të Kosovës, përmes Misionit të Kombeve të Bashkuara (UNMIK). .
Më 24 shtator, një grup i armatosur i serbëve sulmoi policinë e Kosovës në Banjska në veri të Kosovës dhe vrau rreshterin Afrim Bunjaku. Më pas, në shkëmbimin e zjarrit mbetën të vrarë tre sulmues serbë.
Milan Radoiçiq mori përgjegjësinë për sulmin në Banjskë me akuzat se ai “personalisht” e ka organizuar sulmin dhe të gjitha përgatitjet logjistike dhe se nuk ka informuar askënd për ato plane.
Kosova akuzoi Serbinë se qëndron pas sulmit, gjë që Beogradi zyrtar e mohon.
