Bie numri i vizitorëve në Novobërdë, pas mbylljes së kalasë

Ka rreth 4 muaj që Kalaja e Novobërdës po qëndron e mbyllur për vizitorë.

Kjo për shkak të rrezikut nga shembja e mureve të kalasë, të cilat janë të vjetra dhe të punuara keq, raporton KTV.

Disa vizitorë që po qëndronin në Novobërdë për herë të parë thanë se janë të zhgënjyer që nuk mund të hynin brenda monumentit historik.

Ata, madje, drejtuan edhe kritika ndaj institucioneve përgjegjëse, për mosmonitorim të punimeve.

Të dielën, numri i vizitorëve te Kalaja e Novobërdës nuk ishte i madh dhe për banorët e kësaj ane, në këtë ka ndikuar restaurimi i ngadalshëm.

E, nga Ministria e Kulturës kanë thënë që për projektin janë në bashkëveprim me Zyrën e BE-së dhe se dëmet e bëra do të riparohen.

Investimet në Kalanë e Novobërdës kanë nisur në fillim të vitit 2015 dhe kanë përfunduar në tetor të 2016-s, e janë financuar nga Komisioni Evropian, me 1.1 milion euro.