Bayerni në finale të Botërorit të klubeve

Gjiganti gjerman, Bayern Muenchen, është kualifikuar në finale të Kupës së Botës për klube. Të hënën mbrëma, Bayerni në gjysmëfinale e mposhti Al Ahlyn e Egjiptit me rezultatin 2:0.

Botërori i klubeve për vitin 2020 po mbahet në Katar. Turneu është shtyrë për këtë muaj për shkak të pandemisë.

Bayerni, që është fitues në fuqi i Ligës së Kampionëve, avancoi në finale falë sulmuesit të pandalshëm polak, Robert Lewandowski. Ai realizoi për 1:0 në minutën e 17-të, ndërsa rezultatin përfundimtar e vendosi në minutën e 86-të.

Në finalen e 11 shkurtit, Bayerni luan me skuadrën meksikane Tigres.