Bastiset banesa në të cilën dyshohet se u vra 18 vjeçarja
Policia e Kosovës ka bastistuar banesën ku dyshohet se ka mbetur e vrarë 18 vjeçarja në qytetin e Ferizajt.
KALLXO.com nga burime brenda Prokurorisë së Ferizajt mëson se njësia Speciale e Policisë së Kosovës para pak minutash ka kryer një bastisje në banesën që dyshohet se është vrarë 18 vjeçarja nga Ferizaj.
Ky kontroll ka ndodhur pasi ka pasur informata se i dyshuari mund të gjendet në atë perimetër por deri më tani nuk ka asnjë shenjë për vendndodhjen e të dyshuarit të dytë i cili që nga dita e djeshme është në arrati në lidhje me vrasjen e 18 vjeçareje.
Dje në emergjencën e spitalit është sjellë pa shenja jete një vajzë e moshës 18 vjeçare.
Dy persona të dyshuar, pasi kanë sjellë në spital viktimën, janë larguar nga vendi i ngjarjes.
Njëri nga të dyshuarit është arrestuar dje.
Kryeprokurori i Prokurorisë Themelore të Ferizajt, Shukri Jashar tha sot përmes një konference për media se shumë shpejt pritet arrestimi i të dyshuarit të dytë në lidhje me vrasjen e vajzës 18 vjeçare në Ferizaj.
Nga Prokuroria kanë deklaruar se dyshuari i arrestuar tashmë A.S., ka një aktakuzë aktive të vitit 2013 për tentim vrasje.
KALLXO.com ka siguruar kërkesën e paraburgimit ku janë përshkruar dyshimet e para që quan në vrasjen e tashmë të ndjerës, 18-vjeçare M.O.
Një natë më parë, dhuna kishte filluar ndaj viktimës. Motivet sipas prokurorisë ishin xhelozie.
“Ekziston dyshimi i bazuar se më 22 gusht 2021, rreth orës 15:00, në rrugën “Ramdan Rexhepi”, në Ferizaj, në banesën e të pandehurit D.K., me dashje, në mënyrë mizore për motive të ulëta e keqtrajtuar viktimën”, thuhet mes tjerash në arsyetimin e kërkesës për paraburgim.
Dosja e prokurorisë së 18 vjeçares thotë tutje se ajo u keqtrajtua dy ditë deri në vdekje.
Sipas prokurorisë, gjatë gjithë kohës në vendngjarje ishte edhe i dyshuari tjetër me inicialet A.S. por i njëjti nuk kishte marrë asnjë veprim.