Bahtiri i kundërpërgjigjet Thaçit: Kam pritur se do të bëni kallëzim penal ndaj Dick Martyt
Pas kallëzimit penal të bërë nga Hashim Thaçi ndaj Agim Bahtirit, me pretendimin se e ka frikësuar opinionin publik dhe e ka bërë të ndjehet e kërcenuar familjen e tij, ka reaguar kryetari i Mitrovicës duke thënë se nga presidenti ka pritur të bëjë kallëzim penal ndaj Dick Martyt.
Deponimi i Kallëzim Penal në Prokurorinë e Shtetit nga Presidenti Thaçi kundër kryetarit të Komunës së Mitrovicës së Jugut, Agim Bahtirit, ka ardhur pas një deklarate të këtij të fundit ku përmendet rreziku i vëllavrasjes si pasojë e veprimeve të presidentit, por që i pari i Mitrovicës thotë se ky deklarim i është nxjerrë nga konteksti.
Në një prononcim për Veriu.info Bahtiri ka thënë pikat e renditura në Kallëzimin e tij Penal më shumë i ngjanin një fontane dëshirash, se sa një baze ligjore në të cilën mund të thirrej.
Ai thotë se pavarësisht kallëzimit penal nga Thaçi, ai po vazhdon angazhimin e tij të pandërprerë për t’ju qendruar pranë qytetarëve të Mitrovicës në këtë kohë të vështirë që po kalon bota me pandeminë e koronavirusit COVID-19.
“Gjithë angazhimi im do të jetë i fokusuar në lehtësimin e jetesës së qytetarëve, ndërsa atyre që merren me ndryshim të kontekstit të deklaratave të mia, ju them që është më mirë që këtë energji negative ta shndërroni në energji pozitive për Kosovën”, ka theksuar Bahtiri për Veriu.info.
“Dick Marty duhet të gjejë avokatë të mirë – nëse mundet t’i gjejë ndonjë që ta mbrojnë atë – sepse në asnjë mënyrë ai nuk mundet t’i ikë drejtësisë për shpifjet e tij,” deklaronte Thaçi për Reuters duke paralajmëruar padinë në vitin 2010.