ASK
ASK-ja e goditur nga sanksionet e BE-së në projektin për regjistrimin e popullsisë
Sanksionet e Bashkimit Evropian ndaj Kosovës kanë prekur edhe Agjencinë e Statistikave të Kosovës (ASK). ASK-ja është goditur nga Bashkimi Evropian me gjysmë milioni euro në projektin për të ndihmuar në procesin e regjistrimit të popullsisë.
Zëvendëskryeshefi i Agjencisë së Statistikave të Kosovë, Ilir Berisha thekson për KosovaPress, se fondi prej 500 mijë euro ka mbetur i ngrirë për shkak të masave nga Bashkimi Evropian.
“Një letër zotuese kemi marrë prej zyrës së BE, me mjetet e IPA-së, diku një mbështetje financiare prej 500 mijë euro. Por, kjo masë e ka prek 500 mijë euro, por procesi i regjistrimit edhe pse ka qenë një asistim financiar mirë, për shkak se disa aktivitete që ne kemi planifikuar, të cilat nuk mund t’i zhvillojmë me procedurat e prokurimit tonë, kemi planifikuar që të zhvillohen sidomos në marrjen e ekspertizës nga jashtë.
Kjo masë e ka prek dhe këto fonde janë ngrirë, nuk mund të realizohen. Mirëpo, kjo nuk e vë në pikëpyetje realizimin e projektit të regjistrimit të popullsisë me mungesë të këtyre 500 mijë eurove, sepse Qeveria ka ndarë buxhet të mjaftueshëm”, theksoi Berisha.
Zëvendëskryeshefi i ASK-së, gjatë raportimit të premten në Komisionin parlamentar për Buxhet, ka numëruar edhe disa sfidat tjera që e bëjnë të vështirë nisjen e procesit të regjistrimit, siç janë mungesa e tabletave, mungesa e mbikëqyrësve të procesit dhe mostrajnimi i mbikëqyrësve.
Madje, ai ka thënë në Komision se ASK-ja ka dorëzuar propozim në Qeveri për ta shtyrë datën e regjistrimit të popullsisë në prill të vitit të ardhshëm.
Por, në një intervistë për KosovaPress, ditë më parë, Berisha ka mohuar se katër komunat në veri do të ndikojnë në procesin e regjistrimit të popullsisë.
“Janë krijimi i komisioneve komunale në katër komunat e veriut është në proces të punimeve e sipër. Është themeluar një komision komunal nga Mitrovica e Veriut, ka ardhur një vendim për të, ndërsa tri komunat tjera, dy komuna kanë dërguar propozimet e tyre sipas legjislacionit në fuqi, Komisioni Qendror i ka refuzuar për shkak se nuk i janë përmbajtur ligjit në strukturën nacionale dhe shoqërisë civile që duhet të jetë si kriter, dhe nëse vonohen me ndonjë propozim të ri, atëherë është e drejtë sipas ligjit e Komisionit Qendrorë që të themelojë këto komisione…’’, përfundon Berisha.
Qeveria me vendimin e fundit pati vendosur që procesi i regjistrimit të popullsisë të nisë më 1 nëntor dhe të zgjasë deri më 15 dhjetor.
