Asfaltohet rruga për në fshatin Bistricë në veriun e Kosovës
Në Bistricë të Shalës, në një prej fshatrave më të thella të banuara me shqiptarë në veriun e Kosovës, konkretisht Komuna e Leposaviqit, ka filluar asfaltimi i rrugës.
Kështu është bërë e ditur përmes një postimi në faqen “Fshati Bistricë”.
Sipas këtij postimi pas asfaltimit të kësaj rruge, në këtë fshat ka edhe shumë punë të tjera për tu kryer.
“Bistricës së Shalës po i kthehet shkëlqimi, ashtu qysh e meriton. Një fshat heroik dhe turistik. Jemi të lumtur dhe falënderues në këtë kohë me qeverinë tonë, me Ministrin dhe njerëzit e saj, puna po vazhdon pa ndal. Misioni ynë është të bëjmë më të mirën për këto treva që njerëzit t’i kenë kushtet për jete sa më të mirë. Ne kemi akoma nevojë për dorën e shtetit që njerëzit e këtyre fshatrave të rrinë dhe të punojnë këtu, me bletari e bujqësi, por edhe me turizëm si sektorë shumë i rëndësishëm”, thuhet në postimin e faqes.
Ndryshe, vitin që lamë pas ministri i Infrastrukturës, Liburn Aliu ka njoftuar se ka përfunduar asfaltimi i rrugëve në veri të Kosovës.
Aliu ka thënë se asfaltimi i këtyre rrugëve është si rezultat i bashkëpunimit të ngushtë në mes të MMPI-së dhe Ministrisë së Punëve të Brendshme. /Telegrafi/
Postimi i plotë:
