Asamblistët e VV-së në Gjilan kapen mes vete, LDK ndërhyn: Problemet e partisë leni jashtë
Një përplasje ka ndodhur mes asamblistëve të Vetëvendosjes në Gjilan, Ismajl Kurteshit dhe kryesuesit, Arianit Sadiku. Ish-deputeti i Vetëvendosjes, tani asamblist në Komunën e Gjilanit, Ismajl Kurteshi ka shpërthyer me nervozizëm ndaj kryesuesit të kuvendit Arianit Sadiku i cili vjen po ashtu nga e njëjta parti.
“Qu prej atyhi e le dikë që i del zot atij vendi”, ka deklaruar Kurteshi me nervozizëm pasi Arianit Sadiku ia ka dhënë dy minuta kohë për të folur jashtë rendit të ditës shefit të grupit të këshilltarëve të LDK-së, Avdyl Aliut.
Kjo e kishte acaruar shumë Kurteshin. Ai i thotë bashkëpartiakut që po ia shqetëson nervat e po e bën hallakam.
Ndërsa Shefi i grupit të LDK-së Avdyl Aliu i thotë Kurteshit që problemet partiake leni jashtë derës së Kuvendit.
“Nervat edhe problemet partiake që i keni i leni të dera jashtë. Mos i sillni këtu brenda”, tha Aliu.
Pas kësaj përsëri ka reaguar Kurteshi duke i kërkuar kryesuesit t’ia ndal fjalën. “Mos ja nxjerr bishtin. Ndalja fjalën”, tha Kurteshi.
E kryesuesi ia kthen shumë shkurt “Baca Sami a e kryve”. /Insajderi/.
