Arrestohen pesë persona për falsifikim të dokumenteve
Policia e Kosovës ka njoftuar se ka arrestuar pesë persona në rajonin e Prizrenit dhe Prishtinës. për falsifikim të dokumenteve, përfshirë edhe diploma shkollore. Gjatë bastistjes në këto rajone, janë sekuestruar para, telefona mobilë, kopje të diplomave të profileve të ndryshme, vula, formularë të ndryshëm.
Policia e Kosovës me njësitë kompetente për hetimin e krimit ekonomik dhe korrupsionit, pas hetimeve disa mujore dje me datën 09.10.2019, në lokacione të ndryshme në rajonin e Prizrenit dhe Prishtinës, ka arrestuar pesë (5) persona të dyshuar për veprën penale “falsifikim i dokumenteve”.
Pesë (5) personat e dyshuar tani më të arrestuar, duke vepruar në grup në një periudhë kohore, me veprimtari ilegale të shtrirë në disa komuna dhe rajone të ndryshme të Republikës së Kosovës në këmbim të pagesave në tarifa të ndryshme, kanë siguruar dokumente zyrtare të falsifikuara–diploma të aftësimit profesional, diploma të shkollimit të mesëm e të tjera, për persona të ndryshëm.
Pas disa muajve të zhvillimit të hetimeve profesionale dhe aplikimit të masave të përcaktuara sipas kodit të procedurës penale të RKS-së (KPPRKS-së), nga sektori rajonal i hetimeve në Prizren në bashkëpunim me Prokurorinë e Shtetit dhe Drejtorinë për Mbështetje të Hetimeve nga DPP në Prishtinë, dje me datën 09.10.2019, në flagrancë janë arrestuar pesë persona të dyshuar katër meshkuj shqiptarë/kosovarë dhe një femër sh/kosovare) duke shitur diploma të shkollës së mesme.
Si vazhdimësi e operacionit gjatë bastisjeve të realizuara në rajonin e Prizrenit dhe Prishtinës janë sekuestruar në cilësi të provave materiale: para, telefona mobilë, kopje të diplomave të profileve të ndryshme, vula, formularë të ndryshëm, forma bllanko të diplomave e të tjera.
Plani operativ është realizuar në bashkëpunim dhe bashkërendim të plotë nga Sektori Rajonal i Hetimeve, Drejtoria Rajonale në Prizren, prokurori i Prokurorisë Themelore-Prizren, Njësia për Reagim të Shpejtë në Prizren dhe Drejtoria për Mbështetje të Hetimeve në DPP Prishtinë.
Të dyshuarit me vendim të prokurorit kompetent dërgohen në mbajtje në kohëzgjatje prej 48 orëve, për procedura të mëtejme ligjore.
