Kandidati për deputet nga Aleanca për Ardhmërinë e Kosovës (AAK), Arbër Tolaj, ka vlerësuar lart pjesëmarrjen e qytetarëve në tubimin zgjedhor të mbajtur në Deçan, duke e cilësuar atë si një tregues të mbështetjes së fuqishme për Aleancën në prag të zgjedhjeve.
Përmes një reagimi pas tubimit, Tolaj e përshkroi Deçanin si “zemrën e Aleancës”, duke falënderuar qytetarët që morën pjesë në aktivitetin elektoral.
“Faleminderit secilit prej jush që ishit pjesë e këtij tubimi madhështor në Deçanin tonë, vatrën e Aleancës, për të vulosur së bashku një kapitull të ri drejt fitores së madhe”, ka deklaruar Tolaj.
Ai theksoi se mobilizimi dhe mbështetja e treguar nga qytetarët e Deçanit përbëjnë një motiv shtesë për vazhdimin e angazhimit politik dhe për realizimin e objektivave të Aleancës.
Sipas Tolajt, entuziazmi i pjesëmarrësve në tubim reflekton besimin e qytetarëve në programin dhe vizionin e AAK-së për zhvillimin e vendit, ndërsa zgjedhjet e ardhshme i cilësoi si një mundësi për hapjen e një kapitulli të ri politik për Kosovën.







