Ambasadori gjerman: Po punojmë për integrimin e Kosovës dhe vendeve të tjera në BE

Ambasadori i Gjermanisë në Kosovë, Jörn Rohde, ka deklaruar se i mbështet përpjekjet për t’i normalizuar raportet e Kosovës dhe për të punuar drejt integrimit evropian, për të gjithë rajonin.

Ai ka theksuar se Gjermania dhe BE-ja janë duke investuar në këtë proces.

“Në vitin 2019 BE-ja dhe shtetet e saj anëtare si tërësi, kanë investuar më shumë se 194 milionë euro më shumë se të gjithë donatorët e tjerë së bashku. Ndërkaq këtë vit, duke qenë të ballafaquar me pandeminë COVID, ne shumë shpejtë ndamë 171 milionë euro shtesë, për të adresuar nevojat imediate në shëndetësi dhe në rimëkëmbjen ekonomike”, ka thënë ai.

Rohde përmes një fjalimi virtual në Ditën e Bashkimit të Gjermanisë, ka theksuar se zgjerimi i BE-së dhe procesi i bashkimit të saj duhet të vazhdojë, derisa ka shtuar se duhet shumë punë për ta kthyer në realitet këtë “ëndërr”.

“Me Gjermanin që tani e mban Presidencën e Këshillit të BE-së, ne po e mbajmë rajonin në agjendë. Zgjerimi i BE-së dhe procesi i bashkimit të BE-së duhet të vazhdojë, megjithatë është e qartë se nevojitet shumë punë e vështirë, për ta kthyer këtë ëndërr në realitet. Hapat në këtë rrugë drejt integrimit kanë nevojë për përkushtim të përditshëm; zbatimi i sundimit të ligjit, luftimi i padënueshëm dhe korrupsionit, përmirësimi i qeverisjes për të mundësuar zhvillimin ekonomik, standard më të mira të jetesës dhe ndjekja e një vizioni të qartë për atë se ku do ta çojë perspektiva evropiane Kosovën dhe tërë rajonin”, ka thënë ai.

Ambasadori Rohde, ka bërë të ditur se gjithë angazhimin e tyre, do ta përqëndrojnë në një vizion kolektiv për rajonin.

“Pas tri dekadash të jetesës në një Gjermani të bashkuar, një gjeneratë e tërë është rritur pa kujtime për Murin e Berlinit, apo kufirin e brendshëm gjerman. Le ta festojmë këtë Ditë të Bashkimit të Gjermanisë si një ditë që simbolizon gjithë këtë, që përkushtimi kolektiv për një vizion të përbashkët të demokracisë, solidaritetit, bashkësisë, diversitetit dhe lirisë, do të shpien në një të ardhme më të mirë për të gjithë”, ka përfunduar Rohde.