Lëvizja Vetëvendosje sivjet ka pësuar traumë të madhe politike. Kjo erdhi pas ndarjes së një pjese të partisë, ku 12 deputetë të saj formuan partinë e re, PSD-në.

I gjithë problemi lindi te kandidatura e Albin Kurtit për kryetar, duke ngjallur debate nëse ai apo dikush tjetër duhet të jetë kryetar konsensual.

Në fund, grupi i Molliqajt, Ahmetit, Ymerit… nuk pranoi që Kurti të kandidonte për kryetar dhe i ndanë rrugët.

Kurti arriti të rikthehet si kryetar, dersa grupi i ndarë nga VV-ja e zgjodhi Shpend Ahmetin lider.

Se sa është i fuqishëm Kurti brenda VV-së e tregon edhe hulumtimi i siguruar nga Ballkani.info.

Ky hulumtim është bërë nga Instituti i Prishtinës për Studime të Opinionit Publik.

Në pyetjen e hulumtimit “ju lutem na thoni cila është figura politike nga radhët e Vetëvendosjes që e pelqeni më së shumti”, Kurti ka marrë rekord 72 për qind të votave.

I dyti më i fuqishmi pas Kurtit në VV është Glauk Konjufca, por me vetëm 9 për qind të votave të të anketuarve.

Pas tij renditet Albulena Haxhiu me 6 për qind, Rexhep Selimi me 3 sa ka edhe Mytaher Haskuka, kurse në fund është Liburn Aliu me 2 për qind. Të tjerët bashkë i kanë marrë 5 për qind. /Ballkani.info/