Aksidenti me katër viktima në Ferizaj, arrestohet një person
Pasditen e sotme ndodhi një aksident trafiku në fshatin Koshare të Ferizajt ku humbën jetën 4 persona dhe një tjetër është dërguar për tretman në QKUK.
Lidhur me këtë rast, me urdhër të Prokurorit të Shtetit një person është ndaluar për 48 orë për shkak të dyshimit të veprës penale “Rrezikimi i trafikut publik”.
Prokuroria Themelore në Ferizaj, brenda afatit ligjor, ndaj të njëjtit, do të paraqesë kërkesë për caktimin e masës së paraburgimit në Gjykatën Themelore në Ferizaj.
Njoftimi i i plotë i Prokurorisë Themelore Ferizaj:
Prokuroria Themelore në Ferizaj, Departamenti i Përgjithshëm, njofton opinionin publik se sot, rreth orës 15:30, në fshatin Koshare- komuna Ferizaj, ka ndodhur një aksident trafiku mes dy veturave, ku, sipas informatave të para, si pasojë e këtij aksidenti, kanë humbur jetën katër (4) persona, ndërsa, një (1) person tjetër është dërguar në Qendrën Klinike Universitare të Kosovës (QKUK) për trajtim të mëtutjeshëm.
Lidhur me rastin në fjalë, në vendin e ngjarjes kanë dal të gjitha Njësitet e Policisë, ekipet e mjekësisë ligjore, eksperti i komunikacionit dhe Prokurori i Shtetit, ku, me urdhër të tij, është ndaluar një (1) person i dyshuar në kohëzgjatje prej 48-orësh, për shkak të dyshimit të veprës penale “Rrezikimi i trafikut publik” nga neni 370 të Kodit Penal të Republikës së Kosovës (KPRK).
Prokuroria Themelore në Ferizaj, brenda afatit ligjor, ndaj të njëjtit, do të paraqesë kërkesë për caktimin e masës së paraburgimit në Gjykatën Themelore në Ferizaj.
