Makinat serbe dhe ato kosovare tani mund të udhëtojnë lirshëm ndërmjet Prishtinës dhe Beogradit, dy kryeqyteteve që i dhanë fund njërit prej tensioneve të shumta mes Serbisë dhe Kosovës: “luftës me targat e veturave” – shkruan AFP.
Me heqjen e kërkesës që drejtuesit e veturave të regjistruara në Serbi të mbulojnë simbolet serbe në targat e tyre, qeveria e Kosovës ka hequr pengesën e fundit për lëvizjen e lirë të shoferëve ndërmjet Serbisë dhe Kosovës, transmeton Ballkani.info.
Në fund të dhjetorit, Beogradi kishte vendosur që nga 1 janari, veturat e regjistruara në Kosovë do të lejohen të hyjnë në Serbi pa mbuluar pjesë të targave.
“Sipas raportit të policisë sonë, e cila ka ndjekur çdo gjë me kujdes, jemi njoftuar se zbatimi ka përfunduar dhe se nuk ka pasur incidente apo pengesa”, ka thënë kryeministri i Kosovës, Albin Kurti, sot në Facebook.
“Prandaj, bazuar në parimin e reciprocitetit si parakusht për normalizimin e marrëdhënieve ndërmjet shteteve të pavarura, mbrëmë morëm vendim që të lejojmë hyrjen e automjeteve që kalojnë kufirin me targa serbe. Masa do të hyjë në fuqi pas botimit në Gazetën Zyrtare”, tha Kurti, citon AFP-ja.
Deri më tani, për të hyrë në Kosovë, drejtuesit e veturave të regjistruara në Serbi duhej të vendosnin një afishe në stemën dhe shkronjat “SRB” në targa. Dhe e njëjta gjë në drejtimin tjetër: simbolet e Kosovës duhej të mbuloheshin – përkujton AFP.
Situata e re “mundëson lëvizjen e lirë dhe të lehtë mes dy vendeve”, sipas Kurtit. Por “vjen pas dy vitesh në të cilat Serbia e përdori çështjen e targave si justifikim për të përkeqësuar situatën e sigurisë në veri të vendit tonë, dhe së fundmi si një përpjekje për të zbutur kritikat me të cilat përballet Serbia nga bashkësia ndërkombëtare pas parregullsive dhe mashtrimeve gjatë zgjedhjeve të 17 dhjetorit”, raporton AFP.
Serbia – kujton agjencia franceze e lajmeve – këtë vendim e shpalli pak ditë pas zgjedhjeve, rezultati i të cilave u kundërshtua nga opozita dhe vëzhguesit ndërkombëtarë, dhe në mes të demonstratave kundër fitores së partisë së presidentit Aleksandar Vuçiq, të cilën AFP e përshkruan si “të djathtën nacionaliste”.
Akuzat u hodhën poshtë të premten në një deklaratë të Zyrës serbe për Kosovën: Kur bëhet fjalë për mundësimin e lëvizjes së lirë, Serbia i përmbushi “obligimet” e saj dhe “dhe një herë deklaroi se është me të vërtetë e përkushtuar për paqen dhe normalizimin”.
Kosova, me një popullsi prej 1.8 milionë banorësh, duke përfshirë 120,000 serbë, shpalli pavarësinë nga Serbia në vitin 2008 – gjë që Beogradi nuk e ka pranuar ende. Dhe pyetja mbetet obsesive për disa serbë, të cilët e konsiderojnë atë territor djepin e tyre kombëtar dhe fetar – shkruan AFP.
Çështja e targave është një problem i vjetër në negociatat mes Serbisë dhe Kosovës, të cilat zhvillohen nën patronatin e Bashkimit Evropian. Në vitin 2011, Beogradi dhe Prishtina ranë dakord të njihnin targat e njëri-tjetrit, por ky vendim nuk u zbatua kurrë plotësisht.
Kjo nxiti tensione që nuk janë shuar kurrë, midis Serbisë dhe ish-krahinës së saj, pavarësinë e së cilës ajo nuk e ka njohur kurrë.
Në vitin 2022, Prishtina njoftoi se nga atëherë do të ndalohet përdorimi i targave serbe, të cilat janë në shumë vetura që i përkasin minoritetit serb në Kosovë, dhjetëra mijëra prej të cilëve jetojnë në veri.
Në shenjë proteste, serbët dhanë dorëheqje nga të gjitha pozitat në institucionet e Kosovës – polici, gjyqësor, komuna… Dhe pastaj bojkotuan zgjedhjet e organizuara për të zgjedhur ata që do t’i zëvendësojnë.
Kështu u zgjodhën kryetarët shqiptarë, gjë që shkaktoi tensione dhe demonstrata shtesë në të cilat u plagosën ushtarë të NATO-s.
Që nga vjeshta, tensionet janë ulur, por takimet e fundit në Bruksel ishin të pasuksesshme. Ende nuk është bërë e ditur data e takimit të ardhshëm të liderëve të Serbisë dhe Kosovës.
Në fund të dhjetorit, Brukseli përshëndeti vendimin e Beogradit për targat si një “hap pozitiv përpara” që “tregon se përparimi është i mundur në procesin e normalizimit të marrëdhënieve” midis Serbisë dhe Kosovës. “BE pret që Kosova të përgjigjet (duke vepruar) në të njëjtën mënyrë”, rikujton AFP-ja që ka shtuar atëherë zëdhënësi i shefit të diplomacisë evropiane, Peter Stano, dhe kjo tashmë është realizuar. /Ballkani.info/
BONUS VIDEO: Serbia vazhdon me veprim të njëanshme duke kërcënuar paqen në rajon







