Haki Abazi
Abazi: Kurti fajtor për mosfutjen në Agjendë për anëtarësim në KiE, ka humbur besimi ndaj institucioneve
Ish-deputeti i Lëvizjes Vetëvendosje, Haki Abazi, e konsideron kryeministrin Albin Kurti fajtorin kryesor që Kosova pritet të dështojë të anëtarësohet në Këshillin e Evropës.
Abazi ka thënë për Ekonomia Online se Kurti e ka pranuar Asociacionin, njëjtë siç bëri me dhënien e tokës Manastirit të Deçanit, por këtë fakt nuk dëshiron ta pranojë para elektoratit të tij.
Abazi, tani deputet i pavarur, vlerëson se bashkësia ndërkombëtare e ka humbur besimin në institucionet kosovare. Sipas tij, kreu i ekzekutivit para ndërkombëtarëve e ka pranuar e statutin e Asociacionit si kusht për anëtarësim në KiE.
“Është një huqje e madhe që ka ndodhur. Realisht ne e kemi ditur që rruga në të cilën është nisur zoti Kurti, duke taktizuar, do të përfundojë në një rezultat të këtillë çka po shohim. Kemi mungesë totale të besimit, të sinqeritetit edhe demokracisë në institucionet e Kosovës. Këto tri elemente janë shumë të rëndësishme”.
“Ai ka bërë zotime të tjera në takimet që ka pasur në dialog. Edhe në takimet për anëtarësim në Këshill të Evropës me zonjën Dora Bakoyyanis por edhe të tjerët, ka thënë një diçka tjetër. Kjo doli gënjeshtër, të themi e zhveshur totalisht, sepse deputetja e Norvegjisë në takimin e Asamblesë Parlamentare e tha troç që votimi pro anëtarësimit të KE-së është pasi që kryeministri ka bërë zotimin për zbatimin e statutit të Asociacionit. Kështu e tha qartë edhe në mënyrë të drejtpërdrejtë, duke e ditur që kjo do të ishte një kosto jashtëzakonisht e lartë për shkak se pas faljes së 24 hektarëve të Manastirit të Deçanit që u vendos në letër duke ia bë dhuratë Dora Bakoyyanis tani po të bëhet edhe zbatimi i statutit ashtu siç është zotuar Kurti”, thotë Abazi.
Veprimet e Kurtit, ai i sheh si “vetëvrasje politike”, sidomos pas kalimit të suksesshëm të fazës së dytë në Asamblenë e Përgjithshme të KiE-së.
“Në këtë moment do ishte ‘vetëvrasja’ më e madhe politike që do ia bënte vetes. Dhe çfarë ndodhi: nga një triumf për kalimin e Kosovës na Asamblenë Parlamentare erdhi në dështimin e plotë; dhe tash viktimizimin, që është stili i vetëm që ka kryeministri Kurti – viktimizim kundrejt dështimeve politike. Dhe e natyrshme që ky taktizim, kjo gënjeshtër ndaj popullit të Kosovës doli në përfundim…”
“Unë mendoj që nga fillimi është nisur gabim negociatat e tij edhe në dialogun Kosovë-Serbi edhe për çështjen e anëtarësimit në mekanizma ndërkombëtarë ka qenë po aq e pasinqertë dhe vetëm për përfitime të tij politike të ngushta politike dhe asgjë nuk ka të bëjë me kauzat me premtimin se nuk do bëhet asnjë lëvizje para pa u gjet ata që janë zhdukur me dhunë apo pa pranuar Serbia realitetin e ri në Kosovë. Jemi kthyer realisht në nivelin që nuk ka ndodhur ndonjëherë në politikën e Kosovës”.
Mosfutjen në agjendë sidomos pas kalimit të fazës së dytë, sipas Abazit tregon humbje të besimit ndaj institucioneve kosovare.
“E para e ka kontaminuar rrugëtimin e vet drejt anëtarësimit në KiE, është kontaminim sepse kur ndodh një test i tillë kur voton Asambleja Parlamentare me shumicë votash, e nuk futet në rend dite do thotë se këtu është krijuar një lloj konflikti në agjendë dhe kjo nuk është e shëndetshme për Kosovën”.
“Dhe e dyta, mbi të gjitha ka humbur besimi ndaj institucioneve të Kosovës dhe kryeministrit Kurti, sepse siç e thashë gënjeshtra doli të qytetarët dhe mosmbajtja e zotimit tek ndërkombëtarët është një sandviç ku e ka vendosur Kosovën në mënyrë absolutisht jomeritore për qytetarët e vendit dhe për të drejtën e Kosovës për të qenë pjesë e KiE-së”, u shpreh Abazi.
