Superliga

Gjilani barazon me Suharekën, fitore “e çmendur” e Dukagjinit

Dukagjini i Klinës e ka mposhtur Feronikelin 74 të shtunën në ndeshjen e zhvilluar në stadiumin “18 Qershori” në Klinë, ndonëse mbeti me dy lojtarë më pak në fushë.

Ballafaqimi i xhiros së 13-të ishte dramatik dhe u vendos në minutat e fundit të ndeshjes.

Hekuran Berisha shënoi golin e gjashtë për Dukagjinin në këtë edicion, katër minuta pasi nisi pjesa e dytë.

Në minutën e 74-t, Berisha u ndëshkua me karton të kuq. Në minutën e 81-të, direkt me të kuq u përjashtua nga loja edhe Faton Neziri.

Epërsinë numerike të futbollistëve në fushë, Feronikeli 74 e shfrytëzoi dhe i barazoi shifrat në minutën e 88-të me sulmuesin Nikolaos Ioannidis.

Feronikeli 74 u mundua që të marrë pikët e plota nga ky ballafaqim, por u dënua nga skuadra e drejtuar nga Ismet Munishi.

Dukagjini shënoi fitoren pas golit të Vitor Hugos, në minutën e 95-të.

Goli i Hugos u pranua pas rishikimit të situatës në VAR, pasi gjyqtari anësor sinjalizoi për pozitë jashtë loje.

“Offside” nuk pati dhe goli i Hugos ia siguroi pikët e plota klinasve.

Dukagjini tani ngjitet në pozitën e gjashtë me 17 pikë.

Feronikeli 74 mbetet në vendin e fundit me tri pikë, nga po aq barazime. Ka edhe dhjetë humbje.

Për Dukagjinin ishte ndeshja e pestë rresht pa disfatë.

Në këtë ecuri pozitive të rezultateve, Dukagjini ka tri fitore e dy barazime.

Nga një pikë për Gjilanin e Suharekën

Gjilani dhe Suhareka kanë marrë nga një pikë të shtunën nga ndeshja e xhiros së 13-të e Superligës së Kosovës në futboll.

Gjilani – Suhareka, e zhvilluar në terrenin me bar sintetik në Gjilan, u mbyll 1:1.

Nikola Stijepoviq në minutën e 31-të shënoi për Suharekën, ndërsa gol të bukur për Gjilanin realizoi Senad Jaroviq, gjashtë minuta më vonë.

Gjilani dhe Suhareka tani kanë nga dy barazime e një disfatë në tri ndeshjet e fundit.

Pas 13 ndeshjeve të luajtura, Gjilani ka 14 pikë në vendin e tetë. 14 pikë i ka edhe Ferizaj me një ndeshje më pak të luajtur.

Suhareka ndërkohë, me një ndeshje më pak të zhvilluar, ka 18 pikë në pozitën e pestë.