legjenda e Interit

Zanetti flet për të ardhmen e Icardit

Zëvendëspresidenti i Interit, Javier Zanetti, ka garantuar se Mauro Icardi është shumë i lumtur dhe se do të nënshkruajë kontratë të re në kohën e duhur.

Kapiteni i zikaltërve është ndër sulmuesit më vrastar në Evropë, dhe ka klauzolë prej 110 milionë euro në kontratën e tij me Interin, e cila është e vlefshme vetëm për dy javët e para të muajit korrik.

Klubi dëshiron ta rrisë apo largojë në tërësi klauzolën në një marrëveshje për zgjatjen e kontratës, megjithatë deri tani nuk ka asgjë konkrete.

“Mauro është shumë i lumtur në Inter dhe ne jemi shumë të lumtur me të”, tha Zanetti për Tuttomercatoweb.

“Rinovimi do të vijë në kohën më të përshtatshme, dhe jemi në pritje. Ai është i rëndësishëm për ne në fushë dhe jashtë saj, ai është kapiteni dhe pika jonë referuese”, shtoi ai.