Veseli viziton Klubin e Basketbollit Prishtina pas sukseseve në FIBA Europe Cup

Kryetari i Kuvendit të Kosovës, njëherësh lider i PDK-së, Kadri Veseli, i shoqëruar nga ministri i Kulturës, Rinisë dhe Sportit, Kujtim Gashi, ka vizituar sonte Klubin e Basketbollit Prishtina, për ti uruar për suksesin e arritur në garat ndërkombëtare.

Veseli u prit nga krerët e Klubit Prishtina dhe nga dhjetëra basketbollistë të rinj dhe lojtarët e klubit, të cilët e falënderuan për interesimin dhe mbështetjen e vazhdueshme për sportin.

Ai ka shkruar në faqen e tij në Facebook se Dekada e Re do të jetë e ndritshme për të gjithë e sidomos për të rinjtë që merren dhe arrijnë suksese në sport.

“Ndjenjë shumë e bukur që mbrëmjen e sotme ta përmbylli në mesin e dhjetëra kampionëve të ardhshëm dhe yjeve të tashme të Prishtinës të cilët realizuan suksesin më të madh në historinë e sporteve ekipore me kualifikimin në mesin e ekipeve më të mira të FIBA Europe Cup. Rinia dhe sporti janë prioritete të prioriteteve tona. Investimi në ta është investim në zhvillimin dhe promovimin e shtetit tonë. Dekada e Re do të jetë e ndritshme për të gjithë e sidomos për këto kategori të shoqërisë sonë”, ka shkruar Veseli në faqen e tij në Facebook.