Time Kadriaj për incidentin VV – LDK: Nuk ka pasur as përplasje verbale dhe as përplasje fizike
Deputetja e AAK-së, njëkohësisht kryetare e Komisionit për Punë të Jashtme ku edhe raportohet të ketë ndodhur një incident midis deputetëve të Lëvizjes Vetëvendosje dhe Lidhjes Demokratike të Kosovës.
Kadriaj thotë se të gjithë deputetët e kanë parë se nuk ka pasur përplasje.
Ajo në Klan Kosova shprehet se deputetët e Lëvizjes Vetëvendosje shkaktojnë tensione nëpër mbledhjet e këtij komisioni, tek tregon se është detyruar t’ia tërheqë vërejtjen deputetes së Lëvizjes Vetëvendosje, Fitore Pacollit.
“Unë mendoj që të gjithë deputetët e kanë parë që nuk ka pasur përplasje. Mua po më vjen keq për të gjithë që janë në Komision, sepse konform procedurave parlamentare e kemi ftuar ministren të raportojë dhe ju e keni parë mbledhjen e komisionit, kemi pasur ndërhyrje nga deputetja Pacolli, të cilës jam detyruar t’ia tërheq vërejtjen sepse të gjithë deputetët duhet të kenë kohën e tyre. Edhe kur kanë folur deputetët e tjerë, deputetja Pacolli e ka penguar mbledhjen e komisionit dhe kjo nuk është hera e parë që po ndodh, pikërisht prej Fitorës dhe deputetit të VV-së që e keni në studio (i referohet Gazmend Gjyshincës)”, tha Kadriaj.
Më tutje, ajo thotë se nuk ka pasur as përplasje fizike e as përplasje verbale, duke i thënë deputetit të VV-së, Gazmend Gjyshinca se ka përdorur gjuhë fyese dhe jo-parlamentare.
“Vet fakti që deputetët e VV-së janë përgatitur të incizojnë, unë i kam parë anëtarët e komisionit dhe asnjë nuk ma ka konfirmuar se ka pasur përplasje verbale. As përplasje fizike nuk ka pasur. Dhe ti deputet Gazmend, ke fyer dhe ke përdorur gjuhë jo-parlamentare ndaj kolegëve deputetë”, tha Kadriaj.
