Aplikacioni

TikTok ka gjurmuar përdoruesit

E ardhmja e TikTok është e turbullt ndërsa kompania përballe me një shitje të pjesshme ose të plotë për shkak të presionit Amerikan.

Tani është Wall Street Journal që raporton një informacion të ri që turbullon akoma më tepër ujërat mbi të cilat po noton kompania.

Sipas analizës së WSJ të aplikacionit Android, disa versione të TikTok nga 2018 deri në 2020 kishin grumbulluar sasi të pazakonta informacioni për një aplikacion mobil.

WSJ thotë se deri vitin e kaluar TikTok kishte përdorur një problem të njohur sigurie në Android për të anashkaluar mbrojtjet e sistemit operativ që pengonin gjurmimin e përdoruesve përmes adresave MAC.

Kodi MAC identifikon një pajisje në rrjet dhe zakonisht është i pandryshuar dhe mund të gjurmohet edhe nëse përdoruesit shfrytëzon llogari të ndryshme në të njëjtën pajisje duke krijuar ID e një personi me një harduer të caktuar dhe përdorur për qëllime reklamimi por edhe keqdashëse.

WSJ shpjegon se në rastin e Google përdoret një ID reklamimi e anonimizuar që përdoruesit lehtësisht mund ta resetojnë ndryshe nga adresa MAC që nuk ka të njëjtën aftësi.

Në Nëntor të vitit të kaluar TikTok përmes një përditësimi hoqi gjurmimin e adresës MAC. Në 2015-ën App Store dhe Play Store kishin ndaluar grumbullimin e adresave MAC.

Studimi i cituar nga WSJ thotë se janë mbi 350 aplikacione në Google Play Store që grumbullojnë adresa MAC për qëllime reklamimi. Zbulimi vjen në një moment delikat për TikTok i cili mund të shkojë drejt ndarjes.