Presidentja Vjosa Osmani, ka zhvilluar biseda me liderë dhe partnerë ndërkombëtarë pas sulmit terrorist ndaj infrastrukturës kritike të vendit, më 29 nëntor.

Gjatë kontakteve me përfaqësues të vendeve mike, përfshirë presidentë shtetesh, Osmani bisedoi gjithashtu me Sekretarin e Jashtëm britanik, David Lammy, dhe zëvendës sekretarin amerikan të Shtetit, Jim O’Brien.

Presidentja i falënderoi ata për mbështetjen dhe dënimin e qartë të sulmit ndaj sistemit të ujësjellësit “Ibër-Lepenc”.

Diskutimet u përqendruan në sulmin e fundit dhe në implikimet e tij për stabilitetin e Kosovës dhe rajonit më gjerë.

Osmani ritheksoi rëndësinë e bashkëpunimit ndërkombëtar për të garantuar sigurinë dhe mbrojtjen e infrastrukturës jetike të vendit.