Protestë masive në Londër, kërkohet qëndrimi në BE

Mijëra qytetarë që janë kundër largimit të Britanisë së Madhe nga Bashkimi Evropian kanë protestuar nëpër rrugët e Londrës në ditën kur kuvendi britanik po mban seancë për votimin e marrëveshjes së kryeministrit Johnson me BE-në për Brexit-in.

Përkrahësit e grupit të ashtuquajtur “Vota e Popullit” marshuan pranë Pallatit të Westminster-it, ku morën pjesë dhjetëra mijëra njerëz. Në mesin e figurave që po kërkojnë referendum të ri për Brexit-in kishte politikanë, persona të famshëm dhe figura e njohur si z.Brokoli.

Policia metropolitane e Londrës u përgatit për tubimin masiv dhe është parë duke ndërhyrë për t’i ftohur gjakrat gjatë një debati të ashpër në rrugë mes një përkrahëseje të Brexit-it dhe aktivistëve që e kërkonin qëndrimin në BE.

Në një ditë historike për Britaninë, kuvendi britanik u mblodh për herë të parë nga viti 1982 në një të shtunë për të diskutuar rreth planit të kryeministrit Johnson për Brexit-it, për të cilin e mori miratimin e Brukselit.

Protestë mbajtën edhe përkrahësit e Brexit-it, por në tubimin e tyre kishte shumë më pak pjesëmarrës.

Deri të shtunën në mëngjes, më shumë se 500 mijë funte janë mbledhur për ta organizuar protestën e kundërshtarëve të Brexit-it. Më shumë se 170 autobusë me protestues nga pjesë të ndryshme të Britanisë pritet të vijnë sot në Londër për të protestuar para kuvendit britanit, shkruan “Daily Mail”.