Kina

Po përhapet me shpejtësi vala e re e Covid-19 në Kinë

Vala e re e pandemisë Covid-19 në Kinë po përhapet me shpejtësi, tha një zyrtar shëndetësor, me autoritetet që bëjnë thirrje për vigjilencë të shtuar në porte mes rasteve në rritje, në një qytet në kufirin verilindor të vendit.

Rreth 377 raste me simptoma të konfirmuara janë regjistruar nga data 17 deri më 29 tetor, sipas të dhënave nga Komiteti Kombëtar i Shëndetësisë.

Kina është përballur me një sërë shpërthimesh pandemike këtë vit pasi kufizoi ashpër përhapjen e koronavirusit në mbarë vendin në fillim të vitit 2020.

Numri i rasteve mbetet i ulët në krahasim me vendet e tjera.

Megjithatë, ndërsa pjesa tjetër e botës po eksploron mënyra për të bashkëjetuar me koronavirusin, Kina ka mbajtur një politikë të tolerancës zero dhe po bën thirrje për vigjilencë në zonat e saj kufitare dhe portet për të parandaluar rastet e hyrjes së udhëtarëve në territorin e saj.

“Në 14 ditët e fundit, 14 rrethe provinciale kanë raportuar raste të reja të transmetimit vendas ose bartës asimptomatikë të virusit,” tha sot zëdhënësi i Komisionit Mi Feng.

Heihe, një qytet i vogël verilindor prej 1.3 milionë banorësh, i vendosur në anën kineze të lumit Amur në kufi me Rusinë, regjistroi 26 raste pozitive më 29 tetor, një rritje e konsiderueshme nga 9 në 28 tetor dhe nga vetëm një në 27.