Në konferencën e Parlamentit Evropian flitet për vizat dhe dialogun

Kjo konferencë ndërparlamentare është organizuar nga Parlamenti Evropian dhe Kuvendi Kombëtar i Bullgarisë.

Në konferencë është diskutuar rreth Samitit BE – Ballkani Perëndimor, prioritetet e agjendës së Sofjes, procesit të Samitit të Berlinit dhe mbështetjes së vazhdueshme të vendeve të Ballkanit Perëndimor në procesin e anëtarësimit në BE, pastaj rolit të parlamentit kombëtar dhe Parlamentit Evropian në forcimin e perspektivës evropiane të këtyre vendeve, rëndësisë së bashkëpunimit ndërparlamentar dhe rajonal, përshpejtimit të reformave etj.

Anëtari i Komisionit për Integrime Evropiane, deputeti Zenun Pajaziti, duke folur në emër të delegacionit të Kosovës, bëri një përshkrim të gjendjes në Kosovë lidhur me procesin e integrimit evropian, procesin e liberalizimit të vizave dhe rolin e Kuvendit në procesin e anëtarësimit të Kosovës në Bashkimin Evropian. Gjithashtu tha se në kuadër të normalizimit të marrëdhënieve ndërmjet Kosovës dhe Serbisë, kjo e fundit nuk është duke zbatuar marrëveshjet e arritura, si dhe kritikoi deklaratat e presidentit serb me rastin e vizitës në veriun e Kosovës.

“Serbia nuk po i zbaton marrëveshjet e arritura në Bruksel” ka thënë Zenun Pajaziti, gjatë fjalimit të tij, transmeton ballkani.info.

Në këtë konferencë morën pjesë të gjitha vendet e Ballkanit Perëndimor, disa deputetë të Parlamentit Evropian, të parlamenteve kombëtare të shteteve anëtare dhe Kuvendit Kombëtar të Bullgarisë.