Musku nuk po ia gjen fijen lëmshit të mediave sociale

Që kur njeriu më i pasur në botë pagoi 44 miliardë dollarë për Twitter, platforma ka luftuar për t’i përcaktuar rregullat e saj për dezinformimin dhe gjuhën e urrejtjes, ka lëshuar njoftime kontradiktore dhe nuk ka arritur të adresojë plotësisht atë që studiuesit thonë se është rritje shqetësuese e gjuhës së urrejtjes

Tani që ai është kthyer në Twitter, neo-nazisti Andrew Anglin dëshiron që dikush t’ia shpjegojë rregullat.

Anglin, themeluesi i një uebsajti famëkeq neo-nazist, u rikthye të enjten, një nga shumë përdorues të ndaluar më parë për të përfituar nga një amnisti e dhënë nga pronari i ri i Twitter, Elon Musk. Të nesërmen, Musk e kishte larguar edhe Yenë, reperin e njohur më parë si Kanye West.

“Bukur”

“Bukur”, shkroi Anglin në Twitter të premten. “Dua të them, çfarëdo që të jenë rregullat, njerëzit do t’i ndjekin ato. Thjesht duhet të dimë se cilat janë rregullat”.

Pyesni Muskun. Që kur njeriu më i pasur në botë pagoi 44 miliardë dollarë për Twitter, platforma ka luftuar për t’i përcaktuar rregullat e saj për dezinformimin dhe gjuhën e urrejtjes, ka lëshuar njoftime kontradiktore dhe nuk ka arritur të adresojë plotësisht atë që studiuesit thonë se është rritje shqetësuese e gjuhës së urrejtjes.

Siç mund të mësojë “kryetari”, drejtimi i një platforme globale me afro 240 milionë përdorues aktivë të përditshëm kërkon më shumë se algoritme të mira dhe shpesh kërkon zgjidhje të papërsosura për situatat e çrregullta – zgjedhje të vështira që në fund të fundit duhet të bëhen nga një njeri dhe sigurisht që nuk do t’i pëlqejnë të gjithë.

Një absolutist i vetëpërshkruar i fjalës së lirë, Musk ka thënë se dëshiron ta bëjë Twitterin një shesh global digjital të qytetit. Por ai gjithashtu tha se nuk do të merrte vendime të mëdha në lidhje me përmbajtjen ose në lidhje me rivendosjen e llogarive të ndaluara përpara se të krijonte një “këshill për moderimin e përmbajtjes” me këndvështrime të ndryshme.

Me dy mendje

Ai shpejt ndryshoi mendje pas sondazhit të përdoruesve në Twitter dhe ofroi rikthimin në një listë të gjatë përdoruesish të ndaluar më parë, duke përfshirë ish-presidentin Donald Trump, Ye, faqen e satirës The Babylon Bee, komedianen Kathy Griffin dhe Anglin, neo-nazistin.

Dhe teksa vetë tweetet e Muskut sugjeronin se ai do të lejonte të gjithë përmbajtjen ligjore në platformë, përjashtimi i Ye-së tregon se nuk është plotësisht kështu. Imazhi i svastikës i postuar nga reperi bie në kategorinë “e ligjshme, por e tmerrshme”, që shpesh dëshpëron moderatorët e përmbajtjes, sipas Eric Goldman, ekspert i ligjit të teknologjisë dhe profesor në shkollën juridike të Universitetit Santa Clara.

Gjersa Evropa ka vendosur rregulla që kërkojnë që platformat e mediave sociale të krijojnë politika mbi dezinformimin dhe gjuhën e urrejtjes, Goldman vuri në dukje se të paktën në SHBA, rregulloret e lira lejojnë Musk ta drejtojë Twitterin siç e sheh të arsyeshme, pavarësisht qasjes së tij jo të përshtatshme.

“Ajo që Musk po bën me Twitterin është plotësisht e lejueshme sipas ligjit të SHBA-së”, ka shpjeguar Goldman.

Presioni nga BE-ja mund ta detyrojë Muskun të përcaktojë politikat e tij për të siguruar që ai është në përputhje me ligjin e ri, i cili hyn në fuqi vitin e ardhshëm. Muajin e kaluar, një zyrtar i lartë i BE-së paralajmëroi Musk se Twitter do të duhet t’i përmirësojë përpjekjet e tij për të luftuar gjuhën e urrejtjes dhe dezinformimin; mosrespektimi mund të çojë në gjoba të mëdha.

Në një lëvizje tjetër konfuze, Twitter njoftoi në fund të nëntorit se do t’i jepte fund politikës së tij për ndalimin e dezinformatave të COVID-19. Ditë më vonë, ajo postoi një përditësim duke pretenduar se: “Asnjë nga politikat tona nuk ka ndryshuar”.

Të premten, Musk zbuloi atë që ai tha se ishte historia e brendshme e vendimit të Twitterit në vitin 2020 për ta kufizuar përhapjen e një historie të New York Post për laptopin e Hunter Biden.

Twitter fillimisht bllokoi lidhjet me shkrimin në platformën e tij, duke përmendur shqetësimet se ai përmbante materiale të marra përmes hakimit të kompjuterit. Ky vendim u anulua pasi u kritikua nga themeluesi i atëhershëm i Twitter, Jack Dorsey. Facebook gjithashtu ndërmori veprime për të kufizuar përhapjen e historisë.

Shkelja e rregullave

Informacioni i zbuluar nga Musk përfshinte vendimin e Twitterit për të fshirë një pjesë të vogël të tweeteve pas marrjes së një kërkese nga fushata e Joe Biden. Tweetet përfshinin foto intime të Hunter Biden që ishin shpërndarë pa pëlqimin e tij – një shkelje e rregullave të Twitterit kundër pornografisë.

Në vend që të zbulonte sjelljen e keqe ose marrëveshjen e fshehtë me demokratët, zbulimi i Musk theksoi llojin e vendimeve të vështira për moderimin e përmbajtjes me të cilat ai do të përballet tani.

“Vendimet e pamundura e problematike” janë të pashmangshme, sipas Yoel Roth, ish-kreu i besimit dhe sigurisë së Twitter, i cili dha dorëheqjen pas disa javësh në pronësi të Muskut.

Ndërsa është larg nga përkryera, Twitteri i vjetër u përpoq të ishte transparent me përdoruesit dhe i qëndrueshëm në zbatimin e rregullave të tij, ka thënë Roth. Kjo ndryshoi nën udhëheqjen e Muskut, tha ai në një forum të Fondacionit Knight këtë javë.

Ndërsa pjesa më e madhe e vëmendjes ka qenë në lëvizjet e Twitterit në SHBA, shkurtimet e punonjësve të moderimit të përmbajtjes po prekin edhe pjesë të tjera të botës, sipas aktivistëve me fushatën #StopToxicTwitter.

“Ne nuk po flasim për njerëzit që nuk janë aq të fortë për të dëgjuar gjëra që lëndojnë ndjenjat”, ka theksuar Thenmozhi Soundararajan, drejtor ekzekutiv i Equality Labs, i cili punon për të luftuar diskriminimin në Azinë Jugore. “Ne po flasim për parandalimin e gjuhës së rrezikshme të urrejtjes gjenocidale që mund të çojë në mizori masive”.

Organizata e Soundararajan qëndron në Këshillin e Mirëbesimit dhe Sigurisë në Twitter, i cili nuk është takuar që kur Musk mori detyrën. Ajo tha se “miliona indianë janë të tmerruar se kush do të rikthehet” dhe kompania ka ndaluar përgjigjen ndaj shqetësimeve të grupit.

Gjuha e urrejtjes

Rastet e gjuhës së urrejtjes dhe epiteteve racore u rritën në Twitter pas blerjes së Muskut, ndërsa disa përdorues kërkuan të testonin kufijtë e pronarit të ri. Numri i postimeve në Twitter që përmbajnë terma urrejtjeje vazhdon të rritet, sipas një raporti të publikuar të premten nga Qendra për Kundër urrejtjes Digjitale, grup që gjurmon urrejtjen dhe ekstremizmin në internet.

Musk ka thënë se Twitteri ka reduktuar përhapjen e tweeteve që përmbajnë gjuhë të urrejtjes, duke i bërë ato më të vështira për t’u gjetur nëse një përdorues nuk i kërkon. Por kjo nuk arriti të kënaqte themeluesin e qendrës, Imran Ahmed, i cili e quajti rritjen e gjuhës së urrejtjes një “dështim të qartë për të përmbushur standardet e tij të vetëshpallura”.

Menjëherë pas marrjes së pushtetit nga Musk dhe shkarkimit të pjesës më të madhe të stafit të Twitterit, studiuesit që më parë kishin raportuar gjuhën e dëmshme të urrejtjes ose keqinformimin në platformë, raportuan se lutjet e tyre kishin mbetur pa përgjigje.

Jesse Littlewood, nënkryetar për fushatat në Common Cause, tha se grupi i tij kontaktoi në Twitter javën e kaluar në lidhje me një tweet nga deputetja amerikane Marjorie Taylor Greene, që pretendonte për mashtrim zgjedhor në Arizona. Musk kishte rikthyer llogarinë personale të Greenes pasi ajo u përjashtua nga Twitter për përhapjen e dezinformatave të COVID-19.

Këtë herë, Twitter u përgjigj shpejt, duke i thënë Common Cause se tweeti nuk shkelte asnjë rregull dhe do të qëndronte i hapur – edhe pse Twitter kërkon etiketimin ose heqjen e përmbajtjes që përhap pretendime të rreme ose mashtruese për rezultatet e zgjedhjeve.

Twitter nuk i dha Littlewoodit asnjë shpjegim përse nuk po i ndiqte rregullat e veta./ina