Mbi 12 mijë veta në “Alba Festival” në Zvicër – vallëzojnë nën ritmin e muzikës shqipe
Një festival vere në zemrën e qytetit të Cyrihut me emrin “Alba festival”, ku artistë nga Kosova, Shqipëria dhe Maqedonia e Verit dhe të gjitha trojet shqiptare, po marrin pjesë nën tingujt e muzikës së bukur shqipe.
Bëhet fjalë për muzikën rock, pop dhe rap.
Publikun e ka përshëndetur përmes një videoje edhe presidentja e Republikës së Kosovës, Vjosa Osmani.
Programin e ka hapur këngëtarje e njohur e hip-hopit, Kida. Më tutje, publikun në numër të madh e ka befasuar paraqitja e këngëtarit të madh nga Prishtina, Sabri Fejzullahu, shkruan albinfo.ch. Ai ishte paralajmëruar për programin e nesërm, por megjithatë sot ka kënduar shkurt para publikut të madh.
Bendi i njohur nga Tetova, “Elita pesë”, bëri një performancë fantastike me një 40 minutësh në vazhdim.
Kanë performuar edhe Ermal Fejzullahu, Ledri Vula, MC Kresha, Lyrical Son, Mozzik etj.
Në pasditen e të shtunës verore, nën vapën e korrikut, në këtë event të shumëpritur ritmi i muzikës shoqëron mirë dhe këndshëm një mori njerëzish. Është një vlerësim se këtu janë më shumë se 12 mijë pjesëmarrës, kryesisht shqiptarë, por edhe të tjerë: zviceranë e të huaj.
Festivali vazhdon deri vonë sonte me një sërë artistësh të tjerë.
