Kurtit i dështon tubimi në Boston| Aktivisti i LVV-së thotë se planin e bëri në mënyrë tinzare Liza Gashi

Aktivisti i Lëvizjes Vetëvendosje dhe anëtari i Shoqatës “Kosova” në Boston të SHBA-së, Afrim Hoxha ka thënë se pavarësisht përpjekjeve për t’ia organizuar një pritje kryeministrit Albin Kurti, janë injoruar vazhdimisht nga zëvendësministrja e Punëve të Jashtme, Liza Gashi.

Hoxha, i cili thotë se është aktivist i LVV-së që 14 vjet, ka thënë se ka marrë shumë reagime për pritjen e Kurtit ku morën pjesë pak persona, përcjell Demokracia.com.

Por sipas tij, fajin për këtë e ka zëvendësministrja Liza Gashi, e cila në mënyrë “tinzare e poshteruese”, ka injoruar shoqatën “Kosova” që ta organizojë pritjen.

“Zëvendës Ministrja Liza Gashi na tha se nuk ka kohë për takim me komunitet… Por në ndërkohë, ajo kishte përgatitur agjendën e vizitës me shoqatën MAAS-BESA nga Shqipëria, duke e injoruar plotësisht Shoqatën Kosova në Boston dhe duke e vendosur para aktit të kryer. Ne prap jemi munduar vazhdimisht dhe e kemi lutur Zv. Ministren Liza Gashi, që të bëhet vetëm një ndryshim në agjendë të vizitës, por nuk ka pranuar në asnjë mënyrë dhe vazhdimisht, në mënyrë tinzare dhe poshtëruese, e ka injoruar çdo tendencë që të na lejohet që të bëjmë pritje madhështore për Kryeministrin Kurti”, ka thënë ai në një postim në Facebook.

Shkrimi i plotë:

Sqarim i domosdoshëm rreth vizitës së Kryeministrit Albin Kurti në Boston, për shkak se shumë persona po pyesin: Si është e mundur që Kryeministri Kurti të pritet vetëm nga 15-16 persona.

– – –

Shoqata Kosova në Boston dhe Grupi Punues i Vetëvendosjes, padyshim se kemi pasur në plan që të bëjmë pritje madhështore për Kryeministrin Kurti dhe me të dëgjuar për datën e ardhjes, menjëherë i kemi filluar planet dhe përgatitjet.

Por, çfarë ndodhi?

Zëvendës Ministrja Liza Gashi na tha se nuk ka kohë për takim me komunitet… Por në ndërkohë, ajo kishte përgatitur agjendën e vizitës me shoqatën MAAS-BESA nga Shqipëria, duke e injoruar plotësisht Shoqatën Kosova në Boston dhe duke e vendosur para aktit të kryer. Ne prap jemi munduar vazhdimisht dhe e kemi lutur Zv. Ministren Liza Gashi, që të bëhet vetëm një ndryshim në agjendë të vizitës, por nuk ka pranuar në asnjë mënyrë dhe vazhdimisht, në mënyrë tinzare dhe poshtëruese, e ka injoruar çdo tendencë që të na lejohet që të bëjmë pritje madhështore për Kryeministrin Kurti.

Po të ishte lejuar që Shoqata Kosova në Boston ta bënte organizimin, padyshim se mbi 500-600 persona do ta pritnin Kryeministrin Kurti në Boston, tamam ashtu siç e meriton.

Vlen të theksohet se, Shoqata Kosova në Boston, e ka mirëpritur Albin Kurtin në vitin 2012 në Boston, atëherë kur Albin Kurti nuk ishte në pushtet. Shoqata Kosova në Boston ka mirëpritur edhe deputetë, ministra dhe ish Presidenten Jahjaga, sa herë që kanë ardhur në Boston. Por kësaj here, në mënyrë tejet poshtëruese, Shoqata Kosova në Boston u injorua dhe u poshtërua nga Zv. Ministrja Liza Gashi.

Kjo se çfarë ka ndodhur, padyshim se është një njollë tepër e madhe që nuk fshihet dot, dhe personi përgjegjës për këtë dështim duhet të japë përgjegjësi zyrtare dhe morale. Kryeministri Kurti nuk e meriton të ketë bashkëpunëtorë të tillë që e largojnë nga populli.

– – – –

Si aktivist 16 vjeçar i Shoqatës Kosova Boston, qysh nga fillimi i Shoqatës në vitin 2006,

Po ashtu, si përkrahës dhe aktivist 14 vjeçar i Vetëvendosjes qysh nga viti 2008,

E kam për obligim moral ti sqaroj këto gjëra që kanë ndodhur në ditët e fundit.

Mos të harrojmë: “Lëvizja VETËVENDOSJE! është komunitet i njerëzve që refuzojnë të nënshtrohen”.