QKUK

Kurti publikisht lëvdata kompanisë që po kryen renovime në QKUK, a po e favorizon atë?

Kryeministri Albin Kurti dhe ministri i Shëndetësisë përuruan sot renovimet në Klinikën e Onkologjisë në QKUK.

Kurti shprehu mirënjohje të veçantë për “Ego Elsa”, një kompani që është angazhuar edhe më herët në renovimin e klinikave të QKUK-së.

Gjatë fjalimit të tij, Kurti tha se “ajo çfarë ju ka bërë përshtypje të gjithëve është që nga jashtë njihet Klinika e Onkologjisë ndonëse operatori ekonomik e ka gëlqerosur edhe përjashtë, ndonëse kjo nuk ka qenë në kontratë”.

Ndërkaq, ai tha se nga brenda klinika ka ndryshuar aq shumë sa nuk do ta kishte njohur.

“Brenda ajo që e bën dallim kryesor dhe unë po të mos kisha hy në këtë derë nuk e kisha ditur se në cilën klinikë jam, është fakti se është thyer tavani dhe është ngritur për 30 centimetra e jo vetëm kaq, por ka pastrim të ajrit me filtrim e klimatizim”, tha Kurti.

Kryeministri e falënderoi kompaninë që tha se i ka kryer punët një muaj e gjysmë para kohe.

“Krejt në fund operatori ekonomik “Ego Elsa” e ka pasur kontratën për përfundimin e punimeve në javën e parë të korrikut, e ka përfunduar një muaj e gjysmë më herët, për çfarë i falënderojmë publikisht”, tha ai.

Kurti tha se në këtë klinikë janë investuar 600 mijë euro, të cilat tha se e kanë “transformuar në mënyrë fort domethënëse këtë klinikë kaq të nevojshme dhe të dobishme”.

“I kanë pasur 45 shtretër, tash i kanë bërë 60 shtretër dhe së shpejti do të jenë 110 shtretër. Përveç kësaj me akseleratorin e ri të cilin e kemi instaluar, lista e pritjes është zero, pra nuk ka pritje, dhe ky akselerator pati kushtuar 1 milion e 444 mijë euro”, tha ai.

Kompania “Ego Elsa” është angazhuar nga Ministria e Shëndetësisë që të kryente punë edhe gjatë viteve të kaluara në QKUK.

Në verë, kjo kompani ka bërë adaptimin e hapësirës për angiograf për Klinikën e Neurologjisë në QKUK. Në dhjetor të vitit 2022 ka bërë instalimin e sistemit te gazrave mjeksore në QKUK. Edhe më herët, kjo kompani është angazhuar në lëshimin në funksion të sistemit qendror të furnizimit me oksigjen për të gjithë shtretërit e Klinikës Infektive.