Fitore Pacolli e shpërndan mashtrimin e Xhelal Sveçlës

Deputetja e Vetëvendosjes, Fitore Pacolli, e cila vazhdimisht mburret me çdo veprim të Qeverisë, e ka shpërndarë në Facebook mashtrimin e ministrit të Punëve të Brendshme dhe Administratës, Xhelal Sveçla, i cili sot tha se Policia e Kosovës për herë të parë ka nisur me patrullimin e rregullt të vijës kufitare mes Republikës së Kosovës dhe Serbisë, si dhe në të gjithë hapësirën e Liqenit të Ujmanit.

Pacolli e ka publikuar një fotografi të Vetëvendosjes ku shkruan se për herë të parë që nga paslufta Policia e Kosovës e fillon patrullimin ujore të vijës kufitare gjatë gjithë hapësirës së Liqenit të Ujmanit.

Por deklarimin e Xhelal Sveçlës e demantoi ish drejtori i Policisë së Kosovës, njëherësh deputeti i PDK-së, Rashit Qalaj i cili tha se Policia patrullon në atë pjesë që nga viti 2008.

Në emisionin “Frontal” të T7, Qalaj tha se “duhet t’i gëzohemi kur policia shton aktivitetet në ofrimin e shërbimeve të sigurisë për qytetarët dhe mbrojtjen e integritetit territorial dhe sovranitetit të shtetit”.

“Atë çfarë mund të them në lidhje me deklaratën e zotit Svecla ‘se Policia e Kosovës për herë të parë patrullon në Liqenin e Ujmanit’ është absolutisht e pavërtetë. Policia e Kosovës ka patrulluar në këtë pjesë, në këtë resurs të rëndësishëm të vendit, që nga viti 2008. Këto patrullime kanë qenë kryesisht të bazuara në planifikimet operacionale që janë bërë, pra nuk ka qenë patrullim i rregullt për çdo ditë, mirëpo kanë qenë patrullime të bazuara në planifikimet operacionale”, tha Qalaj.

“Nëse i referohemi deklaratave të ministrit dhe këtij subjekti politik, atëherë Kosova ekziston vetëm nga 14 shkurti, mirëpo Policia Kufitare e Kosovës ka patrulluar në këtë pjesë të vendit që nga viti 2008”, u shpreh Qalaj.

Qalaj foli edhe për vizitën e ish-presidentit Thaçi në Ujman.

“Ajo ka qenë një vizitë e karakterit tjetër, meqenëse presidenti në atë kohë ka vizituar Policinë Kufitare në pikën kufitare në Bërnjak. Është interesuar për mbarëvajtjen e punës, kushtet e punës dhe është interesuar se si po zbatohet marrëveshja e integruar e kufirit dhe pastaj ka bërë një xhiro së bashku me Bedri Hamza dhe Abelard Tahirin, pastaj kam qenë unë që i kam ofruar siguri më njësitet speciale, drejtori i AKI-së dhe një numër i madh i gazetarëve”, tha ish drejtori i PK-së.

Qalaj tha se ish presidenti Thaçi ka “dëshiruar t’i shijojë bukuritë e rralla”.

Ndryshe, sot ministri i Punëve të Brendshme, Xhelal Sveçla, ka thënë se Policia e Kosovës ka filluar me patrullimin e rregullt të vijës kufitare mes Republikës së Kosovës dhe Serbisë, si dhe gjithë hapësirës së Liqenit të Ujmanit.

Sipas Sveçlës, kontrolli i kufirit shtetëror është më i plotë.

“Për herë të parë që nga paslufta, pas krijimit të njësitit për patrullim ujor, Policia e Kosovës sot filloi me patrullimin e rregullt të vijës kufitare mes Republikës së Kosovës dhe Serbisë, si dhe gjithë hapësirës së Liqenit të Ujmanit. Tashmë, kontrolli i kufirit shtetëror është më i plotë. Përgëzoj Policinë e Kosovës për suksesin e radhës!”, ka shkruar Sveçla. /Demokracia.com/