Feronikeli përforcohet me ish-reprezentuesin e Kosovës
Qendërmbrojtësi Alban Pnishi i është bashkuar Feronikelit.
Klubi nga Drenasi ka prezantuar ish-reprezentuesin e Kosovës, që së fundmi ishte pjesë e skuadrës së Bnei Yehuda në Izrael. Nga janari ishte lojtar i lirë.
Para Bnei Yehudas, Pnishi është paraqitur edhe në Wohlen e Grasshopers në Zvicër.
“Ai ka edhe paraqitje me reprezentacionin e Kosovës dhe shpresojmë që përvoja e tij të jetë tejet e dobishme për skuadrën”, thuhet në njoftimin e klubit.
Te Kosova ishte paraqitur tetë herë, me ndeshjen e fundit më 2017.
29-vjeçari në karrierën e tij ka pasur 275 paraqitje. Deri tash ka realizuar katër gola.