Vazhdojnë protestat

Dyshime të fuqishme se policë specialë nga Serbia u përfshinë në protestën e Banjallukës

Në Banjallukë është mbajtur një protestë e re “Drejtësi për Davidin” përmes së cilës po kërkohet të zbardhen rrethanat e vdekjes së 21-vjeçarit, David Dragiçeviq, i cili u zhduk në natën e 18 marsit 2018, dhe trupi i tij u gjet gjashtë ditë më vonë.

Babai i tij Davori, pretendon se Davidi ishte “rrëmbyer, përdhunuar dhe vrarë nga pjesëtarët famëkeq të Ministrisë së brendshme të Republikës Serbe”.

Policia ka deklaruar se bëhet fjalë për vrasje.

Në anën tjetër, ministri i Sigurisë në Bosnje, Dragan Mektiq ka deklaruar se nuk duhet përjashtuar mundësinë se pjesëtarët MUP-it nga Serbia kanë marrë pjesë në protestën e dhunshme dje në Banjallukë, transmeton Ballkani.info.

“Unë nuk do ta përjashtoja atë mundësi. Natyrisht që një gjë të tillë askush s’e pranon dhe se këtë tash do ta demantojnë të gjihtë, por në Banjallukë edhe sot edhe dje po flitet publikisht se njësi të tilla kanë ardhur nga Serbia që ta ndihmojnë Millorad Dodikun”, ka thënë ai.

Protestuesit po ecnin në rrugën në të cilën kishte shkuar Davidi natën e 18 marsit, edhe pse policia e kishte bllokuar hyrjen në sheshin kryesor të Banjallukës.

Të martën dhe të mërkuren protesta janë mbajtur edhe në Sarajevë dhe Beograd.

Të martën, policia arrestoi Dovar Dragiçeviqin mbi akuzat se protestat e tij përbënin një kërcënim për sigurinë. Ai u lirua të mërkuren, dhe menjëherë iu drejtua mediave, duke deklaruar se do të vazhdojë protestat për të kërkuar të vërtetën e vdekjes së djalit të tij, Davidit.

Pas lirimit të Davor Dragiceviq, Ministri i Brendshëm i Republikës Serbe, Dragan Lukaq, tha në një konferencë të jashtëzakonshme për media, se në periudhën e kaluar, përfaqësuesit e “Drejtësisë për Davidin” u përpoqën të hynin në Pallatin e Presidentit të Republikës Serbe dhe në Kuvend.

“Këto janë gjëra që nuk mund të tolerohen, ata nuk janë të mitur, ligjet duhet të respektohen”, tha Lukaq.