Paraqitja e mirë

Ambasada amerikane uron Kosovën për ndeshjen ndaj Anglisë

Ambasada e Shteteve të Bashkuara të Amerikës në Kosovë e ka lavdëruar ekipin kombëtar të Kosovës për paraqitjen e mirë në ndeshjen e mbrëmshme kundër Anglisë, duke shtuar se, në sport dhe në shuma fusha të tjera, Kosova po e dëshmon se është gati për ligat e mëdha.

Anglia shënoi fitore me rezultat 5-3 në ndeshjen e mbrëmshme kundër Kosovës, në stadiumin e Southamptonit, “St.Mary’s”, duke i dhënë kështu fund ecurisë së Kosovës prej 15 ndeshjeve pa disfatë.

Megjithatë, përkundër rezultatit të kësaj ndeshjeje, Ambasada e SHBA-së i lavdëroi “Dardanët” për paraqitjen e shfaqur në fushë.

“Urime ekipit kombëtar të Kosovës për paraqitjen e mirë kundër Anglisë. Në sport, ashtu si në shuma fusha, Kosova është duke e dëshmuar veten se është gati për ligat e mëdha. Mezi po e presim rimeçin në shtëpi”, shkruhet në deklaratën e lëshuar nga ambasada amerikane.

Congratulations to the Kosovo National Team for its strong performance against England. In sports, as in so many…

Gepostet von U.S. Embassy Pristina, Kosovo am Mittwoch, 11. September 2019

Takimi i mbrëmshëm nisi furishëm dhe Kosova kaloi në epërsi falë një gabimi të mbrojtësit anglez Keane. Vedat Muriqi e vodhi topi dhe asistoi te Valon Berisha që shënoi pas 41 sekondave lojë.

Përgjigja e Anglisë ishte e shpejtë me Raheem Sterling që shënoi me kokë në minutën e 8-të.

Anësori i Manchester City pastaj asistoi për Harry Kane, i cili e mashtroi Mërgim Vojvodën dhe mposhti portierin Arijanet Muric, duke i dhënë epërsinë anglezëve për herë të parë në takim në minutën e 19-të.

Gjërat u vështirësuan për vizitorët, pasi brenda shtatë minutave morën tre gola. Vojvoda shënoi në portën e vet, para se Jordan Sancho të shënonte dy herë në minutat 44’ dhe 45’.

Kombëtarja dardane u rikthye furishëm në pjesën e dytë, duke shënuar dy gola të shpejtë. Valon Berisha me golin e dytë personal e mposhti Jordan Pickfordin në minutën e 49-të, para se Vedat Muriqi të shënonte nga penalltia, të cilën e kishte fituar vetë gjashtë minuta më vonë.

Vendasit kanë mundur ta thellonin epërsinë sikur Harry Kane të shënonte nga penalltia në minutën e 65-të. Por, Muric e lexoi dhe e mbrojti gjuajtjen e sulmuesit anglez.

Skuadra e Gareth Southgate mbetet lidere e Grupit A me pikë maksimale nga katër ndeshje. Kosova e Bernard Challandes, ndërkohë, zbret në pozitën e tretë më 8 pikë, një pikë më pak se Republika e Çekisë në vendin e dytë. Kjo pasi Çekia e mundi 0-3 Malin e Zi.

loading…