Nesër na pret spektakli në Superligën e Kosovës
Si asnjëherë më parë, Superliga e Kosovës po bëhet nga java në javë gjithnjë e më interesante dhe e paparashikueshme.
Kur kampionati elitar i futbollit vendor ka arritur deri në xhiron e 30, asgjë ende nuk është e qartë as sa i përket asaj se kush do të stoliset me titullin e kampionit, e as se kush do të bie nga Superliga, shkruan KosovaPress.
Nesër, janë në program për t’u zhvilluar tri super-ndeshje të cilat zhvillohen duke filluar nga ora 15:00.
Në Gjilan përplasen Drita me Prishtinën. Skuadra nga Gjilani e kryeson tabelën me 64 pikë, kurse ajo nga kryeqyteti pozicionohet në vendin e tretë me 60 pikë.
Ndeshja tjetër po ashtu shumë e rëndësishme është ajo e cila zhvillohet në Suharekë ku Ballkani e pret Gjilanin që tani drejtohet nga ish- trajneri i Ballkanit, Ismet Munishi.
Ballkani është i dyti në tabel me 61 pikë kurse Gjilani në të katërtin me 43 pikë.
Llapi kundër Trepçës është sfida tjetër interesante ku këto dy skuadra po luftojnë për mesin e tabelës dhe momentalisht kanë vetëm një pikë diferencë ndërmjet tyre në të mirë të skuadrës së trajnerit Batatina.
