Mustafa thotë se Kurti dhe Osmani e kanë ditur që në ShBA nuk do të ketë ndarje, kryetarin e VV-së e cilëson frikacat
Kryetari i LDK-së, Isa Mustafa, ka thënë se marrëveshja në Uashington është një hap drejt normalizimit të marrëdhënieve me Serbinë.
Ai ka thënë se LDK i ka besuar ShBA-së dhe Grenellit nga fillimi dhe se ka qenë e bindur se në Uashington nuk do të ketë ndarje, por as ndryshim të kufijve.
Në emisionin Pressing në T7, Mustafa ka thënë se edhe Albin Kurti e Vjosa Osmani që po pretendojnë se marrëveshja është e dëmshme, e din dhe e kanë ditur se në Uashington nuk do të ketë “thika mbi harta” e as ndarje.
Sipas tij, Kurti, si kryeministër i vendit, ishte frikacak.
“Kam parë mungesë të vendosmërisë, të guximit, që të sfidohet me atë çështje”, është shprehur Mustafa.
“Kam parë që po heziton të shkojë atje. I kam thënë se SHBA’ja s’na sfidon me diçka që ne s’mund ta pranojmë”, ka thënë Mustafa.
“(Richard) Grenell ka thënë se nuk do t’ia imponojmë palëve asgjë që nuk dëshirojnë”, ka treguar kreu i LDK’së.
Ish-kryeministri Mustafa ka insistuar se marrëveshja e arritur më 4 shtator është e dobishme për Kosovën, por edhe për Serbinë dhe në përgjithësi për vendet e Ballkanit Perëndimor.
