EMA jep dritë jeshile për vaksinën “Johnson and Johnson”
Agjencia Evropiane e Barnave (EMA) ka dhënë “dritë jeshile” për vaksinën antiCOVID të kompanisë amerikane “Johnson and Johnson” për të gjithë personat mbi 18-vjeç.
Komiteti i EMA-s arriti në përfundimin se të dhënat mbi vaksinën përmbushnin të gjitha kriteret për efikasitetin, sigurinë dhe cilësinë.
Vaksina Janssen është e katërta e autorizuar në BE për të parandaluar COVID-19 dhe deri tani e vetmja vaksinë që ka nevojë për një dozë të vetme.
Vaksina “Johnson and Johnson” mund të ruhet në frigoriferë normalë, gjë e cila mund të lehtësojë transportimin e saj. Ajo është 67 për qind efektive në parandalimin e infektimit me COVID-19.
Në fazën e 3 të provave klinike, vaksina tregoi shkallë të lartë parandaluese ndaj sëmundjeve të rënda, me një efikasitet deri në 85% dhe 57% në rastin e variantit të koronavirusit të shfaqur në Afrikën e Jugut.
Në bazë të marrëveshjeve, 200 milionë doza pritet të arrijnë në Bashkimin Evropian deri në fund të vitit 2021./tch
